Lalín aproba a licitación do proxecto para converterse plenamente en smart
mércores, 31 de outubro do 2018
O
Concello de Lalín vén de dar un paso de gran relevancia nos seus
obxectivos de crear unha vila smart: mellor xestionada, máis
sustentábel, mellor comunicada e máis innovadora e participativa.
Hoxe
mesmo, o Goberno local, da man do tenente de alcalde Nicolás
González Casares, deu a coñecer a aprobación da licitación do
proxecto de Cidade Intelixente de Lalín. O edil engadiu que o
obxectivo é marcar un antes e un despois na modernización
tecnolóxica do concello. Tamén lembrou que as empresas que queiran
optar a este contrato teñen de prazo para presentar ofertas ata o
día 13 de novembro, cun orzamento de licitación de aproximadamente
250 mil euros.
A
iniciativa, nun plano máis concreto, é un proxecto para o
subministro, instalación e explotación dunha solución integral de
Smart City mediante procedemento aberto. Este proceso insírese
na estratexia DUSI Lalín Ssuma21, co-financiada nun 80% por fondos
FEDER mediante o POCS 2014-2020.
González
Casares engadiu que do que se trata, en parte, é de dotar de
servizos tecnolóxicos ao cidadán, pero, sobre todo, de “crear
contornas atractivas e competitivas tecnoloxicamente”, pois,
sinalou, “onde hai tecnoloxía, instálase máis tecnoloxía”.
Segundo
o concelleiro, o lanzamento da Smart City Lalín “é unha
iniciativa que se pon en marcha xa de xeito moi ambicioso e que
permitirá converter a vila nunha auténtica vila intelixente,
constituíndo un antes e un despois na modernización tecnolóxica da
localidade e dos seus servizos públicos”.
O
edil tamén especificou que as empresas que queiran optar a este
contrato teñen de prazo para presentar ofertas ata o día 13 de
novembro, debendo achegar unha solución composta polos seguintes
subsistemas: sistema de axuda ao aparcamento, sistema de carteleiría
dixital, plataforma Smart City e rede de comunicacións Wi-Fi.
A empresa adxudicataria encargarase da instalación, soporte e
explotación de todo o equipamento do sistema e, no caso de que sexa
preciso realizar obra civil, tamén correrán a cargo da empresa
todas as actuacións necesarias.
O
Sistema Intelixente de Axuda ao Aparcamento (SIAE) permitirá
recompilar información do estado de ocupación das diferentes zonas
de estacionamento público de Lalín e presentala nos paneis de
información dos sistema (SCD) para informar a cidadanía en tempo
real. O SIAE funcionará sobre o aparcadoiro municipal Aldea Grande e
sobre o campo da feira, aínda que no futuro, sinalou González
Casares, “poderase estender a outros espazos, ofrecendo datos
inmediatos de entrada e saída de vehículos, co obxectivo de
informar á cidadanía e facilitar o seu uso”.
Polo
que atinxe ao Sistema de Carteis Dixital (SCD) consiste na posta en
servizo dun sistema de información en tempo real mediante a
disposición de paneis electrónicos en diferentes formatos que serán
controlados a través dunha plataforma software central de xestión
de contidos. Cada panel disporá dunha ou varias pantallas de alta
resolución e gran formato en función da súa finalidade. Este
sistema de pantallas instalarase en diferentes puntos xeográficos do
casco urbano (ambulatorio, praza da Igrexa, concello etc.) e das
proximidades, e proporcionarán información de interese para o
cidadán sobre todo tipo de cuestións como eventos, actividades,
incidencias ou datos de asistencia ao tráfico e ao estacionamento.
O
terceiro eixo de actuación dentro da iniciativa consistirá na posta
en servizo dunha plataforma Smart City ou de “control de
cidade” que funcionará como elemento central de xestión dos
sistemas electrónicos anteriores (SIAE e SCD). Estará baseada nun
modelo na nube conectado por rede cos diferentes equipos (paneis,
cámaras...) e dende o que se poderán xestionar todos eles. “Esta
plataforma constituirá o núcleo integrador do sistema Smart
City, permitindo interconectar todos os seus compoñentes e
dispoñer dunha visión única e unha xestión integrada”, engadiu
o Concello.
Para
rematar, habilitarase un sistema de comunicacións sen fíos Wi-Fi,
co que se busca fornecer de conectividade aos sistemas e a plataforma
de Cidade Intelixente e, ademais, servirá para dotar de conexión
aberta e de alta velocidade diferentes instalacións municipais como
o consistorio, a biblioteca, o Lalín Arena e o auditorio. O proxecto
complementarase cun extra de seguridade de gran potencia e que
operará baixo o sistema de devasa (firewall) para garantir a
protección das comunicacións en todas as redes do Concello.