La Voz premia a fidelidade dos seus lectores cun netbook

Os responsables de marketing do xornal La Voz de Galicia, sabedores de que as pautas de consumo de información dos seus lectores cambiaron considerablemente nos últimos anos e que agora pasan por demandar novas cunha inmediatez que só se consigue a través do uso de dispositivos conectados permanentemente á Rede, veñen de apostar polos netbooks para premiar a fidelidade dos seus lectores.
Segundo informan na súa web, a partir deste domingo, 30 de xaneiro, distribuirán de balde unha cartilla que posteriormente, para poder optar ao netbook Prixton Smart P1282, deberase encher cos cupóns que publiquen de luns a vernes durante as dúas semanas seguintes.
Trátase dun Netbook de Prixton que se pon a disposición dos seus lectores por 79 euros e máis a cartilla cos dez cupóns entregados co xornal.
O Netbook Prixton Smart P1282 é, segundo informan, “unha resposta eficaz da industria informática ás necesidades de inmediatez dos usuarios”. Mide 21,3 cm de lonxitude e pesa 650 gramos co cal pódese gardar no bolso ou mesmo nun peto grande para sacalo e consultar datos onde se dispoña duns minutos de tempo libre e de conexión a Internet.
Dispón de batería de litio con catro horas de autonomía e conexión Wi-Fi (aparte de LAN) que facilitan a conexión e o traballo en calquera lugar.
Asemade, conta cunha pantalla de 7 polgadas TFT de alta resolución, memoria RAM de 128 Mb e disco duro de 2 Gb.
Segundo afirman os responsables da iniciativa, “o prezo no mercado deste trebello é de 249 euros”, co que supón unha oportunidade interesante para facernos co noso propio Netbook e levar o traballo, non só á casa, senón tamén aos centros de ocio e entretemento.