LGx15 xuntará máis de mil espectadores na Sala Capitol
luns, 10 de outubro do 2022
LGx15, o espazo de
reflexión sobre o futuro da lingua galega que aproveita a Rede para chegar ao
amplo público, celebrará a súa xornada presencial o vindeiro 27 de outubro ás
18:00 na Sala Capitol de Santiago de Compostela, nunha xornada na que poderemos
ver distintos relatorios cunha duración máxima de 15 minutos que estarán
amenizados con música e humor para que a divulgación das ideas poida realizarse
dun xeito ameno e divertido.
A xornada grávase en vídeo para a súa difusión posterior a través de YouTube,
conseguindo así que os argumentos e experiencias que se transmitan no evento
poderán chegar a un público maior que ao presente na Sala Capitol, buscando
influír nas actitudes e conciencia lingüística e no futuro do galego.
A vindeira edición do LGx15 estará presentada por Lois Pérez, e contará coa
presenza de relatores como Pedro González Boquete, Beatriz Busto Miramontes,
Elsa Quintas Alborés e Guido Álvarez Parga, sendo especialmente salientables as
intervencións da tanxugueira Olaia Maneiro, da
divulgadora médica en redes sociais Fátima Barros, da creadora de
contidos en liña en galego Prado Rúa
(acompañada pola neofalante Fabiana Ambroa Ibárruri) e do enxeñeiro en Informática
Isaac González, co
fundador de Cilenis, Podgalego e Agora.gal, quen falará de Paradoxos, intelixencia
artificial e estratexias para o presente.
Para poder acudir ao LGx15 cómpre facerse cun billete que pode adquirirse en
liña por 6 euros ou por 10 euros no despacho de billetes da Sala Capitol o
mesmo día do evento que nesta edición superará o milleiro de espectadores en
directo.
- O relatorio de Isaac González exporá os paradoxos que xorden da intelixencia artificial