Jorge Cebreiros, á fronte da nova alianza estatal das novas tecnoloxías: SPORA
martes, 31 de xullo do 2012
O presidente da asociación galega Ineo, Jorge Cebreiros, de xeito complementario
máximo representante de CONETIC, vai dirixir oficialmente as rendas de SPORA, o
novo Consello Nacional das Telecomunicacións, Tecnoloxías da Información e a
Comunicación, unha
entidade de cuxa creación falamos recentemente en Código Cero e que, xorde,
precisamente do traballo conxunto de CONETIC e FENITEL. Segundo apunta a
asociación Ineo, a presenza de Cebreiros vai implicar unha serie de vantaxes a
ter en conta para o sector TIC estatal (que buscará novos xeitos de reforzar a
súa voz, nun intre de crise en que a innovación pode ser a chave para superala
e atopar vías de desenvolvemento máis sólidas) e, tamén, para o sector TIC
galego (que terá canles de concorrencia máis firmes).
“Sen lugar a dúbidas”, engaden fontes de
Ineo, “as novas responsabilidades de Jorge
Cebreiros, á fronte de Ineo, CONETIC e SPORA, implicarán un meirande peso do
sector tecnolóxico galego no escenario nacional”. Lembrar que SPORA (acrónimo co que se
identifica este novo espazo de traballo, aberto a novas incorporacións, a
maiores das de CONETIC e FENITEL), integraría na actualidade a máis de 3.000
empresas do sector, achegando ao mercado laboral español máis de 85.000 postos
de traballo directos.
Volvendo á elección de Jorge Cebreiros á
fronte deste proxecto, está a ser valorada por Ineo como un novo avance na
estratexia da asociación galega por achegarse o máximo posíbel “ás institucións nacionais e europeas máis
relevantes para o sector, co obxectivo de defender os intereses das empresas
galegas tecnolóxico-dixitais”. Este logro súmase a recente asunción, por
parte de Ineo, da presidencia de CONETIC, a Confederación Española de Empresas
de Tecnoloxías da Información, Comunicacións e Electrónica.
O obxectivo de SPORA, como lembraremos, é
actuar como representante sectorial ante as institucións e organizacións públicas
e privadas españolas, e traballar intensamente para a difusión da Sociedade da
Información, así como fomentar o emprego responsábel de Internet. Entre os seus
valores fundamentais inclúese sen lugar a dúbidas a suma de capacidades e
potencialidades que representa, amais do coñecemento socioeconómico e
territorial que acubillan ámbalas organizacións empresarias responsábeis
directas desta alianza. Dende SPORA, traballarán pola defensa dos intereses dos
seus asociados e presentarán “un xeito
diferente de facer as cousas, a través do intercambio continuo de información,
obxectivos e propostas de solucións dende a base, constituída polas firmas,
cara arriba, é dicir, cara as organizacións sectoriais e empresariais e a
Administración”.