Investigan a espionaxe a xornalistas estadounidenses a través de TikTok

Ilustración de Gracelynn Wan para Forbes, un dos medios afectados pola espionaxe a través de TikTok

Dende Forbes están a dar conta de que o FBI e o Departamento de Xustiza están a investigar activamente a ByteDance, a compañía propietaria de TikTok, por mor de casos de espionaxe a xornalistas estadounidenses (entre os que figura Emily Baker-White, da propia Forbes), dos que teríase obtido información diversa, incluíndo a súa localización, como confirmou a propia ByteDance a través dunha investigación interna efectuada no mes de decembro.
A compañía chinesa despediu a varios traballadores como xeito de evitar a responsabilidade do sucedido, e aseguran estar a colaborar coas autoridades, aínda que o feito de que a espionaxe fose realizada dende oficinas chinesas non fai máis que acrecentar as dúbidas sobre a seguridade de TikTok, dando peso ás iniciativas lexislativas que poderían rematar coa prohibición de TikTok nos EE.UU. (coa posibilidade de que aconteza algo semellante en Europa).
Actualmente tanto o Departamento de Xustiza como o FBI forman parte doa comisión que demandan a ByteDance que venda a súa participación en TikTok para evitar a prohibición da aplicación por mor do temor de que o Goberno chinés poidan empregar a aplicación como ferramenta de espionaxe e de manipulación cidadá.
Polo momento ByteDance non parece estar disposta a desprenderse do seu negocio fóra de China, e están a apostar pola creación de grandes centros de datos en EE.UU. e a Unión Europa para manter os datos dos usuarios dentro de cadanseu territorio, pero no caso de que dende China seguise a ser posible o acceso a tal información a ameaza á seguridade non se mitigaría, polo que o que poida acontecer con TikTok a nivel global é aínda unha grande incógnita.
Aínda que TikTok sexa unha empresa separada operativamente de ByteDance, tense corroborado que os directivos de TikTok atenden a ordes directas de directivos de ByteDance, de aí que sexa bastante difícil que as autoridades poidan confiar nun bo proceder por parte de TikTok.