Investigadores do Campus de Ourense desenvolven proxectos para mellorar o Google Earth
mércores, 10 de febreiro do 2010
A vía de Veloso foi a de crear unha aplicación que engade ao Google Earth datos meteorolóxicos en 3D, sendo a do seu compañeiro a posta en marcha dun sistema web que pon ao usuario en disposición de interactuar coa información nunha contorna 3D a través de varias canles de navegación.
Segundo informa a Universidade de Vigo nunha completa crónica destes interesantes achados feitos dende a nosa terra, ámbolos dous estudantes contaron coa mesma guía, o profesor Celso Campos, director dos seus proxectos.
O primeiro do que falamos, o de Gumersindo Veloso, xira arredor do clima e as posibilidades do Google Earth como fonte de información sobre o mesmo, servizo de especial importancia a día de hoxe se mire por onde se mire: tanto se queremos obter datos sobre o quecemento da Terra como se, xa nun plano menos transcendente, temos interese por saber que tempo vai facer nas nosas vacacións. A xuízo deste investigador da ESEI do Campus de Ourense, nestes eidos é onde fallan os servizos tradicionais de información meteorolóxica, de aí que fose preciso pór en marcha algo que permitira escoller os datos con meirande detalle e poder combinalos segundo as necesidades do internauta. Este é o alicerce de Google Meteo, “unha ferramenta destinada a reunir as localizacións que desexe o usuario, xunto coa previsión do tempo e o estilo visual da súa presentación”.
No que atinxe á achega do investigador Iván Rodríguez, dicir que o seu traballo parte dunha das grandes vantaxes de Google Earth: as funcionalidades que achega nos servizos de información xeográfica, cos que xa case todos os internautas están familiarizados, ao igual que o están cos moitos navegadores xeográficos en 3D que xurdiron logo ao seu abeiro. Porén, o proceso nin está pechado nin deu o mellor de si, sinala o investigador galego, en parte polas “limitacións propias dos modelos tridimensionais navegables de información”, atrancos que chegan a limitar a interacción co internauta a mesmo a feitura dos datos que se presentan. O seu proxecto de fin de carreira vai directo a albiscar a solución do problema, corrixindo as limitacións dos navegadores coa concorrencia de sistemas de interacción internauta-computadora baseados en espazos en 3D. O seu sistema web pon en xogo tres métodos de navegación:
· Navegación mediante puntos de interese (permite ir directo a unha serie de puntos que son o conxunto final de localizacións onde está amoreada a información).
· Viaxes guiadas ou navegación por rutas de interese (posibilita gozar de percorridos virtuais a través de emprazamentos en 3D e secuencias animadas).
· Navegación libre interactiva (deixa marxe para a exploración libre e dinámica a contorna tridimensional).