Imaxin presenta en Euskadi o seu xogo interactivo en tres linguas: Zooloco
venres, 9 de decembro do 2011
- Culturgal acudiu a Durango en representación da nosa cultura, convidada á esta nova edición da feira do libro vasco
Entre as cousas culturais e tecnolóxicas de
fabricación propia que presentamos os días
pasados en Euskadi, na Feira do Libro e o Disco Vasco celebrada en Durango,
figurou unha que nos colle de preto en Código Cero pola súa natureza dixital e
de coñecemento. Falamos de Zooloco,
proposta multimedia e interactiva que vén da empresa compostelá Imaxin e máis da vasca Elhuyar Fundazioa de Usurbil (Gipuzkoa) e que se dirixe a facilitarlles ás
nenas e nenos de entre 3 e 6 anos a primeira toma de contacto coas novas
ferramentas tecnolóxicas.
O multimedia, que foi presentado o día 7 no stand propio de Culturgal (feira galega que acudiu en
representación da nosa cultura, convidada ao evento de Durango), achégase tamén
baixo o nome de Zoo Zoroa (en
euskera), o que dá unha clave dos seus obxectivos, a maiores de axudar á
introdución nas TIC: promover o emprego do galego e o euskera entre os
internautas e innovadores do futuro.
Asemade, tamén se
ofrece en inglés, segundo informou Imaxin. A presentación combinouse cun
obradoiro lúdico que contou con persoal especializado, no que se convidou a
nenos, nais e pais a que probasen o xogo dixital nos seus distintos idiomas. O
multimedia, informa Imaxin, estrutúrase como unha aventura gráfica cunha serie
de personaxes (Komoko, Van e Bem) que levan ao usuario a un mundo fantástico
habitado por animais, chamado Zooloco.
Para completar a aventura terán que responder preguntas, superar retos, coñecer
e axudar a tódolos seus habitantes.
Amais de Imaxin,
na feira de Durango tamén
participaron a viguesa Sinsalaudio (falando dos novos soportes de música
xunto a creadores vascos), o grupo Acróbata (con Ugía Pedreira e Fred Martins e,
como convidado, Mikel Urdangarín), Artur Trillo (de Talía Teatro), Mr Misto
(que presentou a Caixiña de Mistos, a caravana de filmes infantís), Gálix (que
lles amosou aos rapaces como soan os mesmos contos en galego e en euskera) e
máis Sergio Lago e Xulio Amigo, director e presidente de Culturgal, que fixeron
fincapé no gran poder de convocatoria da feira vasca (unhas 100.000 persoas
cada ano) e no importante que é esta ligazón de irmandade coa cultura propia de
Euskalerría. “Para Culturgal”,
sinalaron, “é unha aspiración de futuro
poder contar cun público tan fiel e que apoia as creacións no seu propio idioma
mercando os seus produtos”. E engadiron: “Para nós foi moi positivo poder estar aquí, ver como se traballa e
percibir o entusiasmo con que a sociedade vasca acude a este encontro cultural,
ademais de que por suposto esta feira é un gran escaparate para as empresas
galegas”.
Os vinte
profesionais galegos que asistiron á Durango Azoka aproveitaron tamén para ter
contactos con editoriais e produtores de Euskalerría, coa intención de crear
sinerxías e poder aprender de todo o bo que se fai por estas terras para
promover a cultura propia.