Imatia automatiza en Navantia Ferrol a disposición dos buques en dique seco
venres, 17 de setembro do 2021
Imatia,
empresa galega desenvolvedora de software específico nun amplo abano
de sectores (dende moda a comercio electrónico, pasando por
administración pública e robótica), vén de subir un novo chanzo
en excelencia tecnolóxica e innovación en Industria 4.0. Fíxoo, en
concreto, habilitando nas instalacións de Navantia Reparaciones en
Ría de Ferrol un sistema para automatizar “con total exactitude”
a posición dos bloques de apoio necesarios para manter a seguridade
dos buques en seco cando son obxecto de postas a punto.
Segundo
explica Imatia, o sistema tradicional “está a chegar ao seu fin”,
xa que viña sendo unha tarefa “absolutamente manual”, con todas
as complexidades extra que este tipo de traballo poñía en xogo nun
proceso tan complexo como garantir a mellor posición dun buque
varado e en seco. “Trátase dunha operación onde a precisión e a
fiabilidade deben ser absolutas”, explican dende Imatia, engadindo
que “un erro mínimo acumulado de 1 centímetro en buques de centos
de metros, poden derivar nun erro fatal”.
Porén,
a proposta de Imatia engade dous conceptos clave: fiabilidade e
precisión. Ao mesmo tempo, “é quen de minimizar os riscos, xa que
o sistema guía directamente ao operador da carretilla”, informou a
empresa galega
Como
sinala Luis Aceituno, coordinador de proxectos estratéxicos en
Imatia, “a partir dos planos dixitalizados do buque establécense
as coordenadas permitindo sinalar con total exactitude onde hai que
situar cada un dos bloques de apoio, ou sexa, onde descansarán as
cadernas ou reforzos do barco. A información das localizacións
trasládase de forma telemática e, virtualmente, o operador dispón
dunha vista en planta do dique na pantalla axustada a unha carretilla
elevadora que sinala a posición da mesma e os bloques de apoio a
situar con precisión milimétrica grazas a un sistema de
posicionamento relativo por láser (LiDAR) instalado no teito da
máquina”. Segundo engade Aceituno, “no intre en que a
carretilla, carrexando o bloque de apoio escollido a través do
sistema, achégase á localización correcta, visualízase o mesmo en
cor verde, instante no que se deposita no chan. Así até os centos
deles que poden compor a cama dese buque. Ademais, supón unha
fiabilidade absoluta en relación cos procesos empregados até
agora”, conclúe.
Esta
solución de Itmatia pode axudar a todo o sector naval a optimizar a
tarefa de asentar con total seguridade un buque nun dique seco para a
súa reparación e/ou mantemento.