Igalia amosa a súa experiencia en Eduemprende Actúa
martes, 1 de marzo do 2016
Hoxe levouse
a cabo en Pontevedra unha nova sesión de Eduemprende Actúa, un
programa do Goberno galego para amosar e pór en valor o talento
emprendedor das nosas mozas e mozos e incrementar, deste xeito, as
súas posibilidades vindeiras de atoparen traballo. Na experiencia de
hoxe concorreron o director xeral de Educación e FP, Manuel
Corredoira, e máis o director do IGAPE, Javier Aguilera. A maiores,
participaron arredor de 150 alumnos do segundo curso dos ciclos de FP
impartidos no IES Frei Martín Sarmiento.
Tralas introducións, a
sesión celebrada no dito centro educativo colleu pulo coa
presentación dun caso de éxito profesional e empresarial. Máis
polo miúdo, o caso de éxito de Diego Pino, socio da empresa Igalia,
dedicada ao desenvolvemento de software libre para grandes empresas
estatais e internacionais. Segundo lembrou, Igalia está formada por
máis de 40 persoas, a compañía que axudou a fundar ten oficinas na
Coruña e Pontevedra e empregados en Barcelona, Helsinqui, Bruxelas,
Madrid, San Francisco, ou Boston, entre outros lugares.
O director xeral de
Educación, pola súa banda, salientou a importancia deste tipo de
actividades para estimular a cultura emprendedora entre os máis
novos. Segundo fixo saber, “o emprendemento funciona como unha vía
idónea para que os titulados da FP galega accedan ao mercado laboral
desde unha posición moi competitiva”. Pola súa parte, o director
do IGAPE recordou aos estudantes que, ao abeiro da Lei de
Emprendemento e a través da Unidade Galicia Emprende, os novos
emprendedores poden acceder a servizos integrais e gratuítos de
asesoramento e titoría para elaborar e avaliar os seus plans de
empresa, así como a axudas específicas para a posta en marcha de
novos proxectos de empresariais.
Nesta convocatoria máis
de 1.700 alumnos dun total de 19 centros de ensino de toda Galicia -
IES e Centros Integrados de Formación Profesional- de Galicia
participarán este curso en Eduemprende Actúa.