Humble Bundle oferta varias mesas de Marvel e Star Wars para o xogo Pinball FX2

Continuando cos lotes de videoxogos ofertados para achegar cartos a causas benéficas, o Humble Bundle lanza unha nova das súas promocións semanais que de seguro que vai ser moi ben recibida por un público moi concreto, as persoas que se criaron botando partidas en máquinas de pinball, xa que en vez de recompilar numerosos xogos, desta volta a oferta é de mesas que poden empregarse no xogo Pinball FX2 de Zen Studios.
O Humble Weekly Bundle: Zen Studios 2 destinará parte dos seus ingresos á Cruz Vermella e a Child’s Play, e os usuarios que paguen a partires dun euro poderán facerse co Star Wars: Pinball: Balance of the Force Pack, a Pinball FX2 – Excalibur Table, a Pinball FX2 – Mars Table, a Pinball FX – Doctor Strange Table, a Pinball FX – Captain America Table e a Pinball FX – Civil War Table, ou sexa, mesas destinadas principalmente a seareiros dos comics da Marvel a ás películas da saga galáctica de George Lucas.
De pagar máis de 6 dólares, será posible facerse tamén cunha serie de mesas de pinball máis recentes, concretamente a de Masacre, xunto cun par de lotes de mesas de Marvel e Star Wars respectivamente. En total, teriamos unhas mesas de pinball valoradas en 47 dólares que poden conseguirse por unha cantidade moi reducida, con achegas que o público pode elixir como se reparte entre a xente de Humble Bundle, os creadores dos xogos e as causas benéficas ás que contribúen.