Hearthstone recibirá a súa primeira expansión a semana que vén

mércores, 3 de decembro do 2014 Marcus Fernández

Un dos grandes fenómenos do ano, o xogo de cartas coleccionable Hearthstone, baseado no universo de World of Warcraft, vai experimentar un importante pulo antes do Nadal, xa que o vindeiro día 9 recibirá a súa primeira expansión, Goblins vs. Gnomos, que engadirá máis de 120 cartas que poderán crearse, gañarse ou mercarse, e que levarán o caos dos enxeñeiros máis frenéticos e fedellos de Azeroth ás barallas a través dos seus enxeños, robots e tecnoloxía.
As cartas de Goblins vs. Gnomos poderán adquirirse en sobre, crear con po Arcano ou gañar na Arena, e funcionan de xeito semellante a como o facían os sobres de cartas clásicas, pero cun novo envoltorio explosivo e con naipes novos. Os novos sobres de cartas poderán mercase nas versións do xogo para Windows, OS X e iPad, de xeiot que o mes de decembro deparará moitas sorpresas aos millóns de seareiros deste popular xogo.


Trailer da expansión Goblins vs. Gnomos

PUBLICIDADE