HTC renova o seu casco de realidade virtual

martes, 9 de xaneiro do 2018 Marcus Fernández

Pese a que Oculus foi a plataforma de realidade virtual para PC que podemos considerar pioneira e conte cun xigante como Facebook amparándoa, a referencia do mercado é HTC Vive, por conseguir unhas experiencias máis completas e inmersivas, pero que xa adoecían de certas eivas propias da antigüidade da súa tecnoloxía, o que mudará en 2018, xa que no CES de Las Vegas anunciaron a súa nova xeración, as HTC Vive Pro.
Este novo casco de realidade virtual supón un importante salto, especialmente no que se se refire a resolución de imaxe, xa que as súas pantallas OLED melloran neste aspecto un 78% chegando a unha resolución combinada de 2.880 x 1.600 píxeles, o que mellorará notablemente a experiencia de uso ao conseguir que os textos sexan máis nítidos e os gráficos máis detallados.
Pero o novo casco non se limita á imaxe, e tamén inclúe uns auriculares de alta calidade cun amplificador integrado, facendo que a sensación sexa máis inmersiva. A cinta coa que o casco se coloca na cabeza tamén ten un deseño máis ergonómico e confortable, repartindo mellor o peso e conseguindo así que sexa máis cómodo empregar o dispositivo durante longas sesións. Adicionalmente tamén inclúe micrófonos duais con cancelación de ruído e dúas cámaras frontais das que os desenvolvedores poderán tirar proveito para desatar a súa creatividade (e avanzar na realidade mixta?).
Polo momento descoñécese a data de lanzamento e o prezo que terá este novo produto, aínda que confírmase que convivirá no mercado coa súa anterior xeración.
En vista de que unha das principais limitacións deste tipo de solucións de realidade virtual de cara a unha experiencia inmersiva son os numerosos cables cos que contan estes cascos, anuncian que van comercializar o Vive Wireless Adaptor, un accesorio compatible con Vive e Vive Pro que facendo uso da tecnoloxía WiGig de Intel permitirá gozar da realidade virtual sen fíos, aínda que haberá que agardar até o terceiro trimestre do ano para poder adquirir este produto que opera na banda dos 60 GHz para evitar interferencias e conseguir así unha baixa latencia e un bo desempeño.

Vídeo de presentación das HTC Vive Pro

PUBLICIDADE