Grand Theft Auto VI tardará máis dun ano en ver a luz

Que o xogo Grand Theft Auto VI tivese programado o seu lanzamento para o outono de 2025 e que ata o momento nin se anunciase a súa data de lanzamento oficial e continuásemos sen ter un tráiler aparte do que se estreou en decembro de 2023 facía temer o peor, e finalmente Rockstar Games sácanos de dúbidas e anuncia que Grand Theft Auto VI non chegará ata o 26 de maio de 2026.
O adiamento de GTA VI non é ningunha sorpresa (Grand Theft Auto V adiou varias veces a súa estrea) e o feito de que Rockstar poña por fin unha data de lanzamento que garanta que o produto poida chegar ao nivel de calidade esixible para unha obra destas dimensións é unha magnífica nova por partida dobre, xa que non só confirma o compromiso da compañía cos xogadores, senón que tamén despexa o calendario de lanzamentos da segunda metade do ano, na que a meirande parte de estudios temían situar as súas novidades para non ter que competir co que prometía ser o meirande lanzamento do ano.
Confirmado que non teremos un novo GTA en 2025, só queda agora agardar a que Rockstar Games comece a adiantar detalles sobre o título que recibirá máis atención na primeira metade de 2026.