Gradiant amosa as posibilidades e vantaxes da súa plataforma de realidade aumentada
luns, 14 de xullo do 2014
O centro tecnolóxico
Gradiant está a dar conta estes días de novos
achados dos seus investigadores en materia de realidade aumentada,
que é un xeito de incluír máis información cando de primeiras non
hai espazo para máis, ao tempo que se contextualiza. Segundo informa
Gradiant, a realidade aumentada liquida os problemas da información
insuficiente ou fóra de lugar combinando os mundos real e virtual e
mellorando a nosa visión do primeiro con información engadida
superposta e, tamén, coa entrada en xogo dos novos dispositivos
(smartphones, tablets, smart glasses) que contribúen a
universalizar e impulsar estas técnicas.
O problema até o de agora
era o seguinte: como conseguir escenarios de realidade aumentada
doados de acadar e que non impliquen modificacións dos códigos da
aplicación nos que se insiren? Aí entra en xogo unha nova
plataforma de Gradiant, Mobile
AR Platform.
Esta plataforma de
realidade aumentada para a creación e visualización de contidos
desenvolvida polo centro galego amosa unha serie de vantaxes, e unha
das principais é que permite realizar de forma rápida, sinxela e
autónoma a creación dos escenarios de ampliación. Ademais, sinala
o investigador Adrián Teijeiro, non é precisa a concorrencia de
persoal experto para a súa integración e aplicación. “Trátase
dunha enorme vantaxe”, sinala, “que permite ignorar os problemas
que facían que até agora a realidade aumentada fose un eido
acoutado para uns poucos”.
Polo que respecta aos
ámbitos de aplicación desta técnica, son moi diversos e numerosos,
engade o investigador, que destaca o seu uso na mercadotecnia
empresarial (o marketing), mellorando a información que se
presenta do produto ou mesmo podendo interactuar co mesmo e optimizar
o feedback cara ao provedor ou fabricante.
Tamén pode supor unha
revolución no turismo, engade o investigador, que salienta o
potencial do seguinte feito: termos ao instante toda a información
relacionada cun punto de interese, monumento, ou mesmo unha guía
totalmente inmersiva da zona de compras dunha gran cidade. Igualmente
a realidade aumentada amosa importantes posibilidades para a
aprendizaxe a distancia (elearning), empregado obxectos 3D de
elementos reais para facilitar a aprendizaxe.
Xa nun plano máis
concreto, Teijeiro lémbranos que a realidade aumentada tamén se
está a aproveitar para o ámbito das tatuaxes e o body art.
Así, a experiencia TattoMedia é un exemplo disto, e trátase dunha
aplicación que parte da ferramenta de autoría de realidade
aumentada de Gradiant e que permite aos artistas e aos seus clientes
introducir contidos adicionais ás súas tatuaxes a través desta
técnica de ampliación do real.