GoPro presenta novas cámaras de acción

mércores, 14 de setembro do 2022 Marcus Fernández

GoPro anunciou hoxe tres versións da súa nova cámara HERO11 Black (a HERO11 Black, a HERO11 Black Edición para creadores e a HERO11 Black Mini) que contan cun novo sensor de maior tamaño que ofrece maior resolución, cor de 10 bits, mellor estabilización de vídeo e o campo de visión máis amplo incluído de forma nativa nunha cámara HERO. Amais, levan a subscrición a GoPro a un novo nivel co envío de vídeos de momentos destacados automáticos ao smartphone, de xeito que chegaría con enchufar a cámara a cargar para que ela mesma suba o contido gravado á conta na nube de GoPro onde, de xeito automático, crearase un vídeo cos momentos destacados que o usuario recibe no teléfono na aplicación GoPro Quik, facendo así máis áxil e doado crear contidos recollendo as nosas vivencias, para despois poder compartilas co mundo ou cos nosos achegados.
A cámara HERO11 Black sería a cámara de referencia dentro deste formato, que sae á venda a un prezo de 449,98 euros; mentres que a HERO11 Black Edición para creadores custa 659,98 euros e inclúe accesorios como unha empuñadura con batería de longa duración e botóns de control, luz LED de alta potencia, porto HDMI para conectar pantallas externas, entrada para micrófono externo e micrófono direccional (opcional), de xeito que sería un grande produtos para a captura de vídeo, a gravación de videoblogs e a transmisión de vídeo en directo.
Pola súa banda, a HERO11 Black Mini farase agardar até o 25 de outubro, terá un prezo de 349,98 euros, e quere destacar polo seu tamaño reducido, o seu peso lixeiro e o seu manexo sinxelo, converténdose nunha opción interesante para os que buscan simplicidade sen sacrificar rendemento nin calidade.
As novas HERO11 poden gravar vídeo até 5,3K a 60 imaxes por segundo, capturar fotografías a 27 Mpíxeles e incluso gravar vídeo cunha relación de aspecto 8:7, o que permite logo recortar o contido para diferentes relacións de aspecto en función de se van publicarse en redes sociais orientadas ao móbil (onde prima o formato vertical) ou en plataformas máis televisivas (onde segue a ser a norma o vídeo en formato panorámico).

Vídeo de presentación das novas HERO11 Black

PUBLICIDADE