Garmin presenta unha pulseira de actividade para nenos

xoves, 29 de setembro do 2016 Marcus Fernández

As pulseiras monitorizadoras de actividade son un produto bastante demandado comercialmente, pero Garmin quixo levalas a un terreo inexplorado anteriormente e anuncia a súa vivofit jr., unha solución de monitorización da actividade diaria para cativos, que promete ser cómoda, resistente, somerxible e cunha autonomía de máis dun ano.
O accesorio non só pretendería comprobar se os nenos permanecen activos como mínimo 60 minutos ao día (tempo mínimo recomendado) senón que tamén pode monitorizar os seus pasos e o seu sono, contando tamén cunha aplicación para móbiles que converte este trebello nun elemento divertido e educativo, que pode axudar aos pais a motivar aos seus pequenos (ofrecendo recompensas se superas os desafíos diarios) ou a indicar as tarefas que os nenos teñen pendentes (como lavar os dentes ou facer a cama).
A vívofit jr. ten acabados rechamantes (en vermello, verde ou con flores) para gustar aos máis novos; conta cunha pantalla cunha resolución de 64 x 64 píxeles que pode lerse baixo a luz solar e que pode presentar, aparte da información da actividade, a hora, a data e o nome do seu propietario; a pulseira mide 136 milímetros; pesa 17,5 gramos; e o seu prezo de venda é de 99,99 euros.

Vídeo promocional da vívofit jr.

PUBLICIDADE