GaliciaTIC celebra a súa 17 edición este 23 de maio
martes, 30 de abril do 2019
O
edificio CINC da Cidade da Cultura vai dar acollida á XVII edición
de GaliciaTIC, o histórico
evento tecnolóxico galego, un referente para calquera cita de
profesionais e empresas dixitais de cantas se celebran na nosa terra
e no ámbito estatal. A cita será o 23 de maio e virá, novamente,
da man da Asociación de Empresas de
Tecnoloxía de Galicia (Ineo) e a empresa INETEC. Ademais,
desenvolverase baixo o epígrafe Tendencias tecnolóxicas e
oportunidades para Galicia.
Segundo
fai saber Ineo acerca dos principais desafíos que se mostran e
encaran en GaliciaTIC, o tempo que estamos a vivir é un intre clave
de maduración nas tecnoloxías innovadoras e a súa aplicación ao
mundo empresarial e á sociedade: un intre para achegar impulsos á
transformación tecnolóxica dos sectores e das empresas, poñendo o
foco nas de menor tamaño. “É por iso que na vindeira edición de
GaliciaTIC seguiremos contribuíndo á devandita transformación,
atraendo a sectores non tecnolóxicos e emprestando especial atención
ás ferramentas e servizos que conformarán un novo ecosistema
dixital nos vindeiros anos”, explican dende a organización do
evento, que concentrará as actividades previstas nunha xornada
matinal na que se darán cita ducias de profesionais do sector TIC e,
tamén, representantes diversos de empresas non tecnolóxicas.
Respecto
do programa, o encontro dará comezo ás 9.30 co acto inaugural a
cargo de Mar Pereira, directora de AMTEGA, e Luis Álvarez Sestelo,
Miguel Merino e Carlos Suárez.
A
continuación será a quenda da conferencia inaugural, que virá da
man de Ed Gabrys, analista, senior director e responsábel de
comunicacións de Gartner. Logo será a quenda das mesas temáticas
(sobre Cidades Intelixentes e traballo na nube, a cargo de Imatia e
Ozona) e, despois dunha pausa para o café, falarase sobre 5G,
seguridade, Intelixencia Artificial, eSaúde e captación de talento
(organizan Deloitte, Orange, a operadora galega R, Sanitas, Ineo e a
Fundación Kion).