Galicia vaise a FITUR cun percorrido sensorial inmersivo para recrear o Camiño
venres, 17 de xaneiro do 2020
A
feira de turismo FITUR (edición 40) que se celebra en Madrid do 22
ao 26 da xaneira servirá de palestra a un creativo e innovador xeito
de coñecer (no plano tecnolóxico) Galicia antes de coñecela (no
plano real). Estamos a falar da
participación na feira da Consellería de Cultura e Turismo e a
Axencia Turismo de Galicia, que achegarán aos asistentes a
posibilidade de recrear o Camiño de Santiago cun percorrido
sensorial inmersivo. Isto será posíbel no stand centrado
no Xacobeo 21.
Avanzárono
na mañá deste venres 17 o conselleiro de Cultura e Turismo, Román
Rodríguez, e a directora da Axencia Turismo de Galicia, Nava Castro,
durante a presentación da programación de Galicia neste certame.
En
concreto, o expositor da nosa Comunidade terá unha superficie de 967
metros cadrados e estará centrado nas particulares de Galicia como
destino turístico, en especial, no Camiño de Santiago na antesala
do Xacobeo 21. Como dixemos, entre as novidades salienta a presenza
dun túnel do Camiño deseñado para “trasladar os valores
culturais e emocionais da Ruta Xacobea a través de sons, imaxes ou
vídeos”. O stand tamén disporá dun mapa interactivo cos
dez itinerarios e un probador virtual con vestimentas e complementos
propios dos peregrinos.
“Estes
recursos recrearán algúns momentos icónicos da peregrinación a
Santiago, como a chegada á praza do Obradoiro”, explicaron
Rodríguez e Castro, engadindo que “tamén estarán presentes
elementos emblemáticos da cultura galega, como o pano propio do
traxe tradicional galego, que viste parte do stand a modo de
fío condutor, ou a icónica cuncha de vieira en diferentes formatos,
tratamentos e posicións”.