Galicia Innovation propón dúas xornadas de relatorios e mesas redondas con representantes do Silicon Wadi
xoves, 10 de abril do 2014
- Unha vista do Silicon Wuadi en Israel achegada dende a Wikipedia
Galicia
Innovation, encontro tecnolóxico internacional promovido pola
Fundación Ronsel e que conta con GlobalNovaTrade e a aceleradora
galega Zarpamos en tarefas de organización, celébrase os días 29 e
30 de maio na Coruña co
apoio de plataformas profesionais como o Colexio Profesional de
Enxeñaría en Informática de Galicia (CPEIG). Como dixemos os
días pasados, nesta súa primeira entrega (pois a idea é repetir
experiencias en datas vindeiras) os convidados serán os partners
que a iniciativa Zarpamos ten en Israel. Estes expertos de Oriente
Próximo participarán ombro con ombro cos seus homólogos
galegos en relatorios e mesas de debate arredor de cuestións que
irán do xeral ao concreto, pero sempre cos seguintes fíos
temáticos: innovación, internacionalización, financiamento,
aceleración e transferencia de coñecemento de Israel a Galicia (e
viceversa). As actividades comezarán o 29 de maio pola tarde coa
apertura oficial do encontro a cargo de Alon Bar, da embaixada de
Israel en España.
Ademais, concorrerán na
xuntanza Noga Kap, especialista en investimentos de capital de risco
e mentora en StartHub, Shira Abel, experto en mercadotecnia
internacional para start-ups, Noam Wekser, especialista en
innovación e desenvolvemento de equipos, Gil Shay, emprendedor en
serie e mentor en StartHub, Eyal Benjamin, director de StartHub, Gil
Canaani, experto en capital risco e capital privado, e Omer
Pomerantz, especialista en Ideación, Java Mobile e solucións de
Oracle.
Pola nosa terra, intervirán Frankie Gómez, fundador e
principal responsábel de Confirmsign, Fernando Vázquez, director e
propietario de Imatia, Manuel González Penedo, director do Grupo de
Investigación en Visión Artificial e Recoñecemento de patróns
UDC, Manuel Varela Rey, director da Axencia Galega de Innovación na
Xunta, Miguel Díez Ferreira, fundador e director de Rede Karaoke e
Ramón Saltor, principal responsábel de The Crowd Angel.
Como
dixemos, o obxectivo de Galicia Innovation é o de fomentar o
intercambio de experiencias entre emprendedores de diferentes países
a través de obradoiros, relatorios e xornadas de networking,
etc. Asemade, segundo nos fixo saber nunha entrevista recente
Manuel García, impulsor de Zarpamos, do que se trata é de mobilizar
a todo tipo de axentes galegos para que compartan este espírito de
intercambio de experiencias e de colaboración alén das fronteiras.
“A Galicia Innovation”, contounos daquela García, “están
convidados todos os grupos de investigación das universidades
galegas, oficinas de transferencia e entidades públicas e
privadas”.
O programa de actividades inclúe tamén unha cea
para facer networking cos expertos procedentes de Israel e
para rematar, o día 30 haberá un DemoDay para
presentarlles (a eles e aos axentes galegos e españois convocados)
os proxectos de Zarpamos, máis outros que se seleccionarán
previamente e independentes da aceleradora.
Programa de
actividades
Día 29 de maio
16.00 a 16.15 Acto de apertura. Presentación do
evento. Intervén Alon Bar (embaixada de Israel en España)
16.15a 16.35 Presentación do modelo de traballo de
StartHub. A interacción coa Universidade. Intervén Eyal Benjamin
(StartHub).
16.35 a 17.30 Mesa redonda: Internacionalización e
adaptación á contorna empresarial internacional. Interveñen Shira
Abel (StartHub), Gil
Shay (StartHub), Miguel
A. Díez Ferreira (Red Karaoke), Ami
(Aldo) Levin (Embaixada de Israel na España).
Modera Nachy López, de GlobalNaveTrade. Ao abeiro desta mesa
redonda, trataranse diferentes temas relativos á
internacionalización de proxectos. Os 5 minutos finais da mesa
reservaranse para que os asistentes podan realizar preguntas aos
relatores.
17.30 a 18.25 Mesa redonda: A innovación como
factor clave do emprendemento. Interveñen Noam
Wekser (StartHub), Omer
Pomerantz (StartHub), Fernando
Vázquez (Imatia), Manuel
González Penedo (UDC). A mesa redonda xirará
arredor da innovación de como esta constitúe un dos piares do éxito
no mercado. Os cinco minutos finais da mesa reservaranse para que os
asistentes podan realizar preguntas.
18.25 a 18.55 Pausa para o café
18.55 a 19.50 Mesa redonda: Investimento e captación
de capital, o reto dos emprendedores. Interveñen Noga
Kap (StartHub), Gil
Canaani (StartHub), Manuel
Varela Rey (Xunta de Galicia), Ramon
Saltor (The Crowd Angel). Os relatores
debaterán nesta mesa redonda arredor de diferentes modelos para o
investimento internacional, facendo fincapé na análise dos
intereses dos investidores cando procuran proxectos fóra do seu
país. Os cinco minutos finais da mesa reservaranse para que os
asistentes podan realizar preguntas.
19.50 a 20.30 Mesa redonda: Experiencias
emprendedoras. Interveñen Eyal
Benjamin (StartHub), Gil
Shay (StartHub), Frankie
Gómez (Confirmsign). Modera Rubén Bastón, de
Elogia. Nesta sesión, os participantes analizarán experiencias
emprendedoras relevantes e darán os últimos consellos aos
emprendedores. Como en anteriores ocasións, reservaranse os 5
minutos finais para que os asistentes podan realizar preguntas.
21.00 Cea privada con investidores, mentores e
convidados.
Día 30 de maio
10.00 a 11.00 Presentación de estilo de traballo de
Zarpamos e sinatura de convenio con StartHub
11.00 a 15.00 Presentación de proxectos
seleccionados aos mentores de StartHub e investidores privados.
A importancia de Israel
A presenza de profesionais de Israel na nosa terra,
da man de Galicia Innovation, será unha gran oportunidade para as
nosas empresas TIC, tanto polas experiencias que se porán en xogo
dende ámbolos grupos de participantes no foro, como polas
posibilidades de investimento e financiamento que se achegan. Cómpre
lembrar que Tel Aviv, a capital do país, xa hai máis de unha década
que se coñece no mundo como Silicon Wadi, que tamén quere
dicir “val”, e chámaselle así porque
está considerado o segundo centro de operacións TIC máis
importante do mundo despois do xa mítico enclave da costa oeste dos
Estados Unidos (Silicon Valley). Ademais, ocupa o segundo posto,
a nivel internacional, en cantidade de iniciativas empresariais
tecnolóxico-dixitais per cápita, máis de tres mil, só por
detrás de Estados Unidos.
Esta importancia das TIC na economía do país non é
nova. De feito, comezou a fraguarse nas décadas dos sesenta e dos
setenta, ao converterse xa daquela nun importante acubillo de
empresas de tecnoloxía (en boa medida debido aos esforzos de
investimento das administracións). O pulo económico israelí aínda
ten máis mérito se temos en conta que se trata dun Estado sen case
recursos naturais de seu, polo que dende o primeiro intre viuse
obrigado a envorcar boa parte da súa actividade económica no
coñecemento e na innovación, piares produtivos que se reforzaron
cunha longa tradición de busca de apoios internacionais, proceso do
que forma parte a súa participación presente en Galicia Innovation.
A día de hoxe, Israel está a asentarse tamén nun
importante nicho de actividade TIC: o nicho da ciberseguridade. De
feito, recentemente púxose en marcha un departamento gobernamental
específico para abordar a cuestión e máis un parte industrial, no
sur do país (a cidade de Beer Sheva), orientado de xeito exclusivo a
empresas desenvolvedoras de programas e servizos para a protección
dos datos e das comunicacións a nivel xeral. A día de hoxe, están
en activo máis 200 start-ups israelís ao acubillo deste
sector.