Galicia Business School facilita formación transformadora avanzada no Biopolo da Sionlla

O Biopolo Sionlla, en Santiago, acolle estes días o desenvolvemento das sesións formativas do programa Xeración Dixital PEMES: Equipos Directivos, impulsado pola escola Galicia Business School e organizado en colaboración coa Asociación Área Empresarial do Tambre e o Grupo FSL.
Nas primeiras sesións presenciais, que se están a celebrar esta semana no Centro de Servizos Innovadores para Empresas Biotecnolóxicas, participan 40 novos alumnos e alumnas, directivos/as e empresarios/as de pemes galegas que, durante os vindeiros tres meses, van a traballar no deseño e implementación do seu propio plan de transformación dixital.
A primeira xornada comezou coa benvida do director de Galicia Business School, Eduardo García Erquiaga, que presentou o enfoque do programa, a metodoloxía, moi práctica e orientada á aplicación real na empresa, e agradeceu ao alumnado “por confiar en nós para continuar formándose neste campo que a día de hoxe é tan importante”. Deseguido, a sesión iniciouse co módulo A empresa na economía dixital, onde os participantes comprobaron no cambio de época no que se vive actualmente as empresas deben adaptar a súa estratexia, cultura e procesos á contorna dixital para non perder competitividade.
A clase, impartida por Enrique de la Rica, centrouse en entender o contexto actual: o cambio de mentalidade que esixe a transformación dixital, o impacto de tecnoloxías como a intelixencia artificial, a análise da información masiva (Big Data) ou a computación na nube (cloud), e como todo isto afecta aos modelos de negocio das pemes. Traballouse especialmente o concepto de digital mindset e a necesidade de que os equipos directivos lideren ese cambio desde dentro.
O programa, de carácter gratuíto, cumpre a súa 22ª edición na que xa supera os 600 profesionais formados en dixitalización.