GALPon lanza en beta a versión 2.0 do sistema MiniNO
luns, 10 de setembro do 2012
Comezamos a semana cunha boa achega de
software libre relacionado de xeito directo coa nosa terra, logo da
publicación do novo informe de CENATIC (moi positivo no que se refire á
presenza de código aberto nas empresas galegas) e, agora, cunha nova versión do
sistema MiniNo, recurso
moi indicado para computadores aos que non se queira someter a grandes consumos
(cousa moi atinada neste tempo en que todo o que se faga polo sostible na enerxía
é pouco) nin a grandes esixencias de hardware. Con todo, unha das grandes
novidades da nova versión é que semella cubrir tódolos tipos de demanda,
abranguendo a quen queira tirarlles bo partido ás cousas sociais que hai na
Rede. A
achega 2.0 vén de novo da man de GALPon, Grupo de Amigos de Linux de Pontevedra,
e faino rebordante de novidades, como o emprego de Debian Wheezy como base e a
adopción do escritorio de LXDE.
A nova versión, operábel en máquinas con
características mínimas de 500Mhz con 128Mb RAM e 2.5Xb de disco ríxido (de aí
cara abaixo aconséllase usar a versión 1.2), presenta dous instaladores:
· Instalador
sinxelo, con dúas opcións: Normal (só
pide datos moi sinxelos de entender por calquera novato) e Non preguntes, faino (pregunta que idioma queremos ter como predeterminado
e pídenos que confirmemos a instalación tras avisarnos de que formatea toda a unidade.
· Instalador avanzado: lembra a existencia do
instalador experto de Debian, para quen preciso un control total da
instalación.
Esta versión engade o catalán como idioma
inicial, grazas a José Angel Gallegos que fixo as traducións. Desta forma son
catro os idiomas utilizables na Vivo
e na instalación inicial, informa GALPon. A achega incorpora tamén a xestión de
Bluetooth e máis a compatibilidade de modems 3G. Tamén se creou unha configuración
de Tor para usala co navegador Midori e poder facer navegación anónima na Rede,
só premendo nunha entrada de menú.
Incorporouse a maiores unha opción para
restaurar toda a configuración inicial do escritorio, unha opción de escritorio
para quen precise o estilo Gnome para traballar, a configuración automática de
impresoras segundo sexan conectadas (sempre e cando o controlador estea instalado)
e os navegadores Iceweasel e o devandito Midori. Amais disto, inseriuse un cronopete,
“algo
que agradecerá a xente que quere usar a Minino con fins profesionais pero
tenlle respecto por si lle falla o disco HD (non esquezamos que estamos falando
de máquinas que xa teñen os seus centos de miles de gravacións nas costas e que
os discos quéixanse)”, informan dende o colectivo GALPón. Esta versión beta da
que estamos a falar xa está dispoñíbel para a libre descarga.