Francia comeza a segunda campaña de advertencias polo intercambio de ficheiros protexidos
xoves, 13 de xaneiro do 2011
En Francia están se cadra como estaríamos nós
no caso de que unha lei como a lei Sinde progresara. Ou, moi probablemente,
peor. De feito, e segundo se informa
na Rede, xa deu comezo no país veciño a segunda campaña de loita contra o intercambio
libre de ficheiros na Internet, campaña que entre outras cousas inclúe o
subministro masivo de advertencias de peche de billa dixital aos internautas
que máis se leven impoñendo como campións
da descarga. Estas e outras medidas abrollan dun organismo específico para
estas actividades antipiratería, o
chamado Hadopi, que xa informou que esta nova campaña de avisos virá acompañada
do subministro a domicilio dunha carta certificada que garanta a recepción do
propio aviso.
En caso de seguir reincidindo, os internautas que teimen no seu “comportamento” recibirán un terceiro e definitivo toque de atención. Isto significará entre outras cousas a entrada en xogo do xuíz correspondente, que logo de recibir un completo dossier sobre as actividades dos usuarios advertidos estará en disposición de cortarlles a conexión. Segundo fontes de Hadopi, a día de hoxe xa se fixeron chegar un total de 70.000 advertencias. O obxectivo é acadar os 10.000 ao día a partir de xuño de 2011, sendo o ritmo actual de 2.000 por xornada.