Fíltranse os plans de Xbox até 2030

Microsoft está a vivir un dos seus peores momentos no que se refire a filtracións, coincidindo no tempo dous incidentes que poden suporlle moitos problemas a longo prazo: por unha banda Wiz Research atopou un fallo de seguridade por parte do equipo de IA de Microsoft que expuxo accidentalmente uns 38 TB de datos privados (da compañía, non dos usuarios); e por outra banda filtrouse documentación sobre os plans de futuro de Xbox remitidos á FTC e que chegaron á luz pública incluíndo información confidencial.
Esta última filtración incluía numerosos correos electrónicos de executivos como Phil Spencer, sendo Microsoft a parte culpable da mesma por non asegurar debidamente o envío dos ficheiros, aínda que o propio Phil Spencer xa saíu a comentar que os corres e os documentos que se filtraron son vellos, polo que non se corresponden cos plans actuais da compañía, que os desvelará cando sexa o momento oportuno.
En calquera caso resulta innegable a documentación filtrada, pois adianta as intencións da división de videoxogos de Microsoft de aquí a 2030, data na que pretenden chegar aos 100 millóns de subscritores de Game Pass (que actualmente podería estar por enriba dos 33 millóns). Tamén teñen claro que deben centrar o rumbo no negocio das consolas (xa que é o compás que emprega o sector); pretenden que o novo mando de Xbox sexa realmente o produto estrela (xa que sería o único necesario para xogar en calquera dispositivo); e prevén que, aínda que as consolas contarán con máis da metade dos xogadores, o xogo na nube podería superar ao de PC antes do salto á vindeira xeración de consolas.
Entre os produtos que estarían en preparación por parte de Microsoft destacaría unha nova Xbox Series X, que mantería o seu formato de torre, pero en vez de ter unha base cadrada optaría por un deseño cilíndrico, en boa medida porque prescindiría de unidade de discos ópticos; e o mencionado novo mando de Xbox tamén sería toda unha revolución, xa que tanto podería empregarse para conectarse sen fíos a unha consola Xbox, como para usarse como mando Bluetooth en distintos dispositivos ou para comunicarse directamente coa nube (na liña do que facía o mando de Google Stadia), de xeito que converteríase na peza máis importante da familia Xbox. Este novo mando podería saír antes de xuño de 2024, mentres que a Xbox Series X sen disco óptico e con 2 TB de almacenamento interno estaría prevista para outubro de 2025.
Resulta evidente que uns plans a tan longo prazo non están escritos en pedra, e cousas como a compra de Activision Blizzard teñen un impacto nos plans de Xbox a longo prazo, polo que haberá que ver como vai progresando a situación, pero de chegar a bo porto o que pretenden co novo mando de Xbox estariamos ante un cambio moi importante a nivel estratéxico, e podería entenderse a lexitimación do modelo de Google Stadia, que tería fracasado máis pola falta de compromiso de Google que polo concepto que pretendía materializar a longo prazo.