Fernando Suárez, novo presidente do consello estatal de colexios de Enxeñaría en Informática
venres, 20 de setembro do 2019
Este
sábado 21 de setembro vaise proclamar de maneira oficial a nova
xunta de goberno do consello estatal
de Colexios Oficiais de Enxeñaría en Informática (CCII), o
órgano que aglutina todas as entidades profesionais do territorio
español ligadas directamente á Enxeñaría en Informática,
incluído o colexio galego CPEIG
que preside Fernando Suárez. Precisamente será o galego Fernando
Suárez o cabeza de lista do consello xeral, en substitución de Juan
Pablo Peñarrubia. Até o de agora Suárez ostentou o cargo de
vicepresidente.
O
presidente entrante do CCII é licenciado en Informática pola
Universidade da Coruña. Actualmente desenvolve a súa actividade
profesional na Deputación de Ourense como director da Área de
Transparencia e Goberno Aberto desde xaneiro de 2018. Desde maio
deste ano, Fernando Suárez é presidente da Comisión de Deontoloxía
e Ética do CCII, órgano encargado da elaboración do Código Ético
e Deontolóxico da Enxeñaría Informática presentado ese mesmo mes.
Tamén colabora en tarefas de avaliación para a implantación de
títulos oficiais e estudos de grao e mestrado e é vicepresidente e
vogal profesional da comisión de Acreditación Euro-Inf da Axencia
Nacional de Avaliación da Calidade e a Acreditación (ANECA).
Ademais, Fernando Suárez desempeña labores como docente en varias
universidades galegas.
O
novo presidente do CCII recibiu diversos recoñecementos ao longo da
súa carreira profesional. En maio de 2015 concedéuselle o premio i3
á Traxectoria Profesional Nacional grazas “a súa gran dedicación
cara a profesión e pola súa contribución ao desenvolvemento da
Enxeñaría Informática en beneficio da sociedade”.
O
pasado mes de maio Suárez recibiu un recoñecemento sobre a
concienciación en seguridade nos Premios Internacionais de
Seguridade Cibernética e Protección de Datos da Asociación
Española para o Fomento da Seguridade da Información.
Con
esta nova candidatura, o consello xeral seguirá traballando para
concienciar sobre a influencia que ten a Enxeñaría Informática na
sociedade actual.