Fernando Guldrís (IGAPE) visita a sede en Bertamiráns de Alfonsín Digital Lab
venres, 20 de xaneiro do 2023
O
director do IGAPE, Fernando Guldrís, visitou este venres 20 de
xaneiro a sede en Bertamiráns (Ames) do estudo Alfonsín
Digital Lab, empresa punteira nos servizos de edición,
postprodución, laboratorio dixital e novos contidos en xeral (con
importantes contribucións tecnolóxicas e artísticas para series e
longametraxes emitidas nas plataformas Amazon Prime Vídeo, HBO Max,
Netflix e Movistar, así como en producións tan sobranceiras como
Operación Marea Negra, Rapa, A desorde que
deixas, Onde está Marta?, Hierro, Auga Seca, La Unidad ou
Néboa).
Guldrís,
na súa visita, puxo en valor a importancia que ten para
a mellora competitiva das pemes locais programas como Galicia
Inviste, que “permiten afondar tanto na diversificación de
proxectos como na aposta pola innovación de cara a mellorar a
competitividade empresarial”. Neste sentido, dixo, “Alfonsín
Digital é un bo exemplo das posibilidades que ofrecen esta e outras
liñas impulsada pola Vicepresidencia primeira e Consellería de
Economía, Industria e Innovación a través do IGAPE”. Segundo
engadiu, no caso concreto da empresa de Ames, o programa permitiu a
integración e posta en marcha da tecnoloxía HDR Dolby Vision, o que
“fai desta empresa especializada no sector audiovisual unhas das
poucas que ofrece este sistema en España, e a única en Galicia”,
subliñou.
Ata
o de agora, segundo informou o director do IGAPE, este programa ten
permitido mobilizar máis de 42M€ na provincia da Coruña,
impulsando proxectos de mellora como a implantación de novos
establecementos, a diversificación ou os cambios nos procesos de
produción. Así, nesta provincia aprobáronse desde o 2018 e ata o
de agora máis de 115 proxectos no marco do Galicia Inviste, que
suman un importe conxunto superior aos 10,5M€.