Estudantes de Redondela e O Porriño gañan a Olimpíada Informática Galega 2026

David Lago, do IES Pedro Floriani de Redondela, e Nicolás Freiría, do IES Ribeira de Louro do Porriño, proclamáronse gañadores da Olimpíada Informática Galega 2026, celebrada na Facultade de Informática da Universidade da Coruña. Ambos estudantes representarán a Galicia na fase estatal da XXX Olimpíada Informática Española, que terá lugar do 10 ao 12 de abril na Escola de Enxeñaría Informática da Universidade de Valladolid.
O certame, organizado polo Colexio Profesional de Enxeñaría en Informática de Galicia en colaboración coas tres universidades galegas, reuniu unha trintena de estudantes de ESO, bacharelato e formación profesional de grao medio procedentes de nove centros educativos de distintos puntos do país. As probas puxeron a proba os coñecementos de programación e lóxica dos participantes, nunha competición orientada a fomentar as vocacións tecnolóxicas entre a mocidade.
O primeiro posto foi para David Lago Alonso, alumno de 2º de Bacharelato no IES Pedro Floriani, mentres que Nicolás Freiría Casal, tamén de 2º de Bacharelato no IES Ribeira de Louro, acadou a segunda posición. Ambos recibiron dotación económica e o pase directo á fase nacional. O terceiro premio correspondeu a Tirso Nieto Senatore, de 1º de Bacharelato no CPR Manuel Peleteiro de Santiago, seguido por Antón Castro Dorribo, do mesmo centro, e por Breixo Vidal Salgueiro, do IES Illa de Tambo de Marín.
O xurado tamén recoñeceu a mellor participante feminina, Antía Paradela Casal, e aos mellores estudantes de ESO, Andrés Covelo Franco e Jaime Daniel Moar Fernández, salientando así a diversidade de perfís e idades presentes nesta edición.
Os dous primeiros clasificados competirán agora na fase estatal, da que sairán os representantes españois para a Olimpíada Informática Internacional, prevista para o mes de agosto en Uzbekistán. A edición galega contou co patrocinio de diversas entidades e empresas do sector das tecnoloxías da información e da comunicación, reforzando o apoio do tecido tecnolóxico á formación do talento novo.