Energizer presentará unha liña de smartphones en Barcelona

Aínda que o Mobile World Congress é normalmente unha cita na que as grandes marcas tecnolóxicas presentan os seus grandes lanzamentos para o que resta de ano sen grandes sorpresas, este ano pode ser algo diferente, tanto pola presentación de distintos móbiles con pantalla flexible como polo feito de que vaia entrar en xogo un fabricante que non esperaba ninguén: Energizer.
A célebre marca de baterías levaría á feira de Barcelona un mínimo de 26 novos produtos, incluíndo tamén un smartphone encartable e un dispositivo equipado cunha batería de 18.000 mAh. Dende GSMArena adiantan xa algún dos teléfonos coa marca Energizer, como o U620S Pop e o U630S Pop, que sorprenderían ao integrar unha cámara retráctil dual a xeito de cámara frontal, mentres que na parte traseira o modelo superior, o U620S Pop tería unha cámara traseira tripla. Estes terminais chegarían ao mercado a comezos do verán.
Tamén terán móbiles máis modestos, como o U650S, que opta por unha pantalla HD+ de 6,5 polgadas cunha pestana superior central con forma de V, que sairía á venda en outubro; mentres que para xuño espérase o U620S (sen o apelido Pop) que tería unha pantalla HD+ de 6,2 polgadas con pestana superior con forma de V.
O móbil de Energizer que veriamos antes nas tendas, probablemente en abril, sería o U570S, con pantalla HD+ de 5,7 polgadas con pestana superior con forma redonda, que sería o terminal de entrada da familia Energizer Ultimate, que sen dúbida chamarán a atención dos consumidores ao presentarse cunha marca que transmite confianza a nivel de autonomía, que é un dos puntos máis valorados por boa parte do público.