En marcha unha plataforma para impulsar a opinión das mulleres nos eidos xornalísticos
mércores, 5 de marzo do 2014
- Ana Lamas, Carmen Plaza e Gloria Lomana, tres das impulsoras desta iniciativa
Impulsar
o papel das mulleres como referentes de coñecemento nas máis
variadas temáticas. E facelo a través dun eido onde precisamente é
necesario impulsar o papel da muller: o eido da Rede. Estes son
algúns dos grandes obxectivos de Plataformaexpertas.com,
un servizo que permite localizar e obter opinións de valor entre un
amplo directorio de mulleres especialistas en calquera actividade. A
plataforma, segundo informan as súas responsábeis, diríxese a
inverter o seguinte dato: nove de cada dez persoas consultadas polos
medios de comunicación estatais para realizar o seu traballo
informativo son homes. A tendencia, din, é claramente excluínte e
xa é hora de pórse mans á obra para freala.
E
máis se temos en conta que se trata de algo inxustificado e que non
contribúe en nada a superar fendas de xénero e vellos prexuízos
(esta teima dos medios de pór aos homes expertos como prioridade). A
iniciativa da que estamos falar vén da man das principais
asociacións de mulleres profesionais de España, entre as que se
conta WomenCEO, impulsora do proxecto.
“Plataforma
de Expertas”, explican, “pon a disposición dos medios de
comunicación unha ferramenta online, desenvolvida por Atos, compañía
internacional de servizos de tecnoloxías da información, que lles
permitirá realizar procuras para localizar os contactos e obter
opinións versadas entre un amplo directorio de mulleres
especialistas en calquera actividade, tanto facendo procuras por
texto libre como por categorías, semellantes ás seccións habituais
da prensa para facilitar a tarefa aos xornalistas”. Segundo fai
saber Elsa Gonzalez, presidenta de FAPE, unha das entidades
promotoras, “os coñecementos das mulleres expertas facilitarán o
exercicio do xornalismo e enriquecerán a actualidade, ao difundir
unha visión máis real da sociedade, polo tanto a plataforma de
expertas elevará a percepción feminina a través dos medios de
comunicación”.
O
servizo conta xa con máis 200 mulleres achegando coñecemento. A
idea é contribuír ao seu medre coa incorporación de novas
candidatas, que poderán inscribirse e pedir formar parte do panel de
especialistas xa dispoñíbel. As solicitudes que se reciben serán
revisadas “por unha comisión independente e mixta, composta por
profesionais con ampla experiencia en selección de persoal que se
encargará de validar as candidaturas”, engaden as impulsoras da
iniciativa.
Segundo
fai saber Ana Lamas, presidenta de Plataforma de Mulleres Expertas e
de WomenCEO, “nestes intres e por inercia histórica o mundo do que
se informa nas noticias é fundamentalmente masculino e non reflicte
a participación social e profesional da muller en todos os ámbitos
da sociedade”. E engade: “Mentres esta situación non cambie,
amais de ser un desequilibrio inxustificable, estarase afastado á
muller do centro de atención mediático, da creación de opinión e
imposibilítase que chegue a súa voz á sociedade”.