En marcha unha plataforma para converter os clubs deportivos en comunidades en liña
martes, 20 de setembro do 2011
A
Rede vai servindo, a bo ritmo, ferramentas e recursos para tódolos sectores de
actividade. Apenas vai ficando algo por cubrir. Neste senso, as escusas das
organizacións (empresas, institucións, asociacións de toda índole, organizacións
sen arela de lucro, etc) para seguir incidindo na falta de diálogo teñen cada
vez menos razón de ser. De feito, semella haber recursos para asegurar a
participación en case calquera eido, por específico que sexa, até en algo tan
aparentemente fóra do virtual como a toma de decisións dos clubs deportivos.
Disto trata Fanarchy, unha nova
ferramenta que descubrimos o mes pasado, vía a primeira edición
española de Startupbootcamp, e que se dirixe, poñendo en xogo unha xestión
democrática, a incrementar as ligazóns entre clubs e seareiros.
Resultado:
máis consenso e máis democracia. A ferramenta ten moito potencial, por exemplo,
non caso de que o club queira incrementar as súas vendas de material
publicitario, co que podería pedirlle aos seus seguidores que deseñen a nova
camiseta, reforzándose así as “ligazóns
emocionais que lles une ás súas cores e incrementando as posibilidades de que
estes acaben por mercala”.
A idea é aglutinar e centralizar. De
feito, é sabido que os seareiros dun club, por modesto que sexa, chegan aos
sitios máis recónditos do planeta, polo que calquera ferramenta que consiga
poñelos en contacto, de xeito continuo, ten un elevado potencial. “Aparte das principais relixións do mundo,
ningún outro colectivo pode afirmar ter un volume semellante de seareiros; porén,
moitos destes clubs só están a rendibilizar unha miúda fracción da súa base de
seareiros global”, comenta neste fío Samuel Aloni, fundador e conselleiro
delegado de Fanarchy. E continúa: “Isto
obsérvase ben cando vemos que dos 525 millóns de afeccionados que teñen os
clubs de fútbol europeo arredor do mundo, só 100 millóns interactúan con eles
en redes sociais e, de acordo cos nosos estudos, os seus ingresos medios por
cada un destes seareiros non chega aos 20 céntimos de euro cada ano”.
A iniciativa Fanarchy, por certo, foi
seleccionada entre os dez equipos que amosarán os seus proxectos na
edición madrileña do programa europeo Startupbootcamp de formación de
emprendedores.