En marcha unha plataforma galega para fornecer contidos en alta calidade aos nosos xornalistas: Miriades.net
xoves, 28 de novembro do 2013
Tal
e como lembramos onte, temos
importantes propostas web galegas en marcha coas que complementar
o cada vez máis interesante panorama informativo de vangarda da nosa
terra (o “de vangarda” vai sobre todo polos métodos e formatos
asumidos, pero tamén por como van afectar estes métodos á
información: de certo que positivamente). Entre estas novas
propostas web, posíbeis en parte grazas ás bolsas iProx do Colexio
de Xornalistas de Galicia e Novagalicia Banco, figura un proxecto en
liña dispoñíbel dende esta semana e presentándose perante o mundo
como “unha nova ferramenta de distribución de contidos
informativos en alta calidade”. Falamos de Miriades.net:
unha
canle para a distribución de vídeo e audio en alta definición (HD)
deseñada para que plataformas cidadás, ou calquera outra fonte
informativa, teña a oportunidade de fornecer material de calidade a
telexornais, informativos de radio e medios escritos.
Segundo
nos contan os responsábeis desta achega (a equipa de Xurimaru),
esta amosa xa dende os seus comezos (dente antes dos seus comezos)
unha gran potencialidade. Isto despréndese do cumprido material
dispoñíbel sobre o conflito da minaría de ouro en Corcoesto,
amplamente rexeitado por unha boa parte da cidadanía, material no
que se inclúe -entre outras cousas- un documental de 34 minutos. Así
nos explican dende Xurimaru as orixes e porqués da súa iniciativa:
“Cada día centos de notas de prensa chegan ás redaccións, a
maioría comunicados de institucións pero tamén notas de prensa de
colectivos cidadáns... Porén, as fontes que proporcionan contidos
multimedia son moi poucas, e case todas institucionais, neste senso
Miriades.net busca rachar este cuase monopolio facilitando que
calquera fonte poida pendurar vídeos, fotos ou audio de alta
calidade para a súa descarga e reutilización por parte dos
xornalistas”. E proseguen, indo ao miolo da cuestión: “Por poñer
un exemplo do devandito, na plataforma xa hai un pequeno documental
sobre o proxecto da macromina a ceo aberto de Corcoesto (Cabana de
Bergantiños), amais de contidos en formato HD deste documental
(entrevistas, planos), para que calquera televisión poida editalos
ao seu xeito”. Asemade, achéganse dúas ducias de fotografías en
alta resolución, cortes de audio das entrevistas e catro pezas
escritas sobre o conflito da mina de ouro.
No
desenvolvemento da plataforma Miriades.net colaboraron Xurxo Salgado
(coordinación e produción), Manuel Vilas (redacción, fotografía e
guión documental), Xosé Bocixa (realización, edición e guión
documental), Ozono Multimedia (deseño e programación) e Miguel
Nuñez (fotografía). O equipo quere agradecer, ademais da concesión
da devandita bolsa iProx, a colaboración
de todos os veciños de Corcoesto -tanto dos que están a favor como
os que están en contra da mina- pola súa colaboración
neste traballo.