En marcha o programa AceleraTech para mergullar as pemes nas vantaxes da dixitalización

martes, 22 de setembro do 2020 S. P.

Na mañá deste 22 de setembro presentouse en Santiago unha iniciativa para facilitar o avance das pequenas e medianas empresas da nosa terra cara ao terreo das novas tecnoloxías, un máis que necesario proceso de adaptación no contexto actual de COVID-19 (e tendo en conta, ademais, o carácter de urxentes que teñen elementos como o teletraballo, o ecommerce, a merdadotecnia dixital ou os novos xeitos de comunicarnos). Estamos a falar do Programa AceleraTech, impulsado pola axencia autonómica AMTEGA e o IESIDE. As actividades comezarán en outubro.
Segundo fixeron saber, “trátase dunha iniciativa formativa que ofrece ás pemes galegas, especialmente ao seu persoal directivo, a posibilidade de achegarse ás tecnoloxías disruptivas máis relevantes e os beneficios e condicionantes necesarios para integralas na súa estratexia, estrutura e modelo de negocio”.
No encontro deste martes 22 o docente do curso, Álvaro Gómez Vieites, avanzou as vantaxes das tecnoloxías disruptivas para o tecido empresarial co relatorio Transformación Dixital, xestión do cambio cultural, e o impacto de Big Data, IoT, Blockchain e a IA na transformación dos negocios.
Segundo explicaron, o programa está especialmente dirixido a xerentes e propietarias/os de empresas, xa “que estas son as persoas con capacidade de decisión e as que poden impulsar e liderar unha transformación tecnolóxica real destas”. As prazas para participar no programa son limitadas e os interesadas poderán preinscribirse na ligazón do CDTIC ata o día 1 de outubro. De entre as solicitudes recibidas, a AMTEGA seleccionará 25 directivos para asistir ás sesións formativas.
O programa desenvolverase a partir de outubro en colaboración con IESIDE e estenderase ao longo de cinco sesións formativas e un obradoiro final. As temáticas das sesións versarán sobre os seguintes aspectos: negocios dixitais; análise de datos a gran escala (Big Data), Ciencia de Datos e Intelixencia Artificial; Internet das Cousas e 5G; cadea de bloques (blockchain); ciberseguridade e transformación dixital das pemes con LEGO.

PUBLICIDADE