En Ames a veciñanza do rural poderá capacitarse dixitalmente cunha serie de obradoiros
martes, 31 de agosto do 2021
O
Concello de Ames está en pé de loita contra fenda dixital, agravada
pola pandemia e moi presente, por desgraza, nos ámbitos non urbanos
do noso territorio. Con este motivo, a
Concellería de Cultura habilitou unha serie de cursos para achegar
coñecementos sobre novas tecnoloxías ás parroquias de Ames. A
veciñanza interesada xa pode formalizar a inscrición. Os obradoiros
terán unha duración de 25 horas prácticas, repartidas durante 3
meses en dúas horas á semana. Ofértanse 10 prazas en cada un
deles.
O
obxectivo principal deste programa é “familiarizar aos veciños/as
co uso das Tecnoloxías da Información e a Comunicación, as TIC,
ensinándolles a incorporalas a distintos aspectos da vida diaria, de
xeito seguro e axeitado”, informaron as responsábeis de Cultura,
engadindo que con este programa “darase resposta á unha das
demandas dos Orzamentos Participativos do ano 2020”.
Nas
primeiras sesións impartiranse nocións básicas de iniciación á
informática o sistema operativo, o uso do teclado, a elaboración de
documentos sinxelos ou o tratamento da imaxe. Nas seguintes xornadas
aprenderase sobre a navegación por Internet, o uso de distintos
navegadores, o emprego dos buscadores, o correo electrónico, as
redes sociais, o almacenamento na nube, a realización de distintos
trámites a través da rede, aspectos de seguridade a ter en conta,
etc.
Ademais,
o curso, a pesar de que se desenvolverá co uso de equipos
informáticos, inclúe explicacións para aprender a quitarlle o
máximo partido aos dispositivos móbiles.