Emprendedores 2020 leva ao CNTG a súa mensaxe anti-crise
luns, 1 de xullo do 2013
O vindeiro martes 9 de
xullo, o Centro de Novas Tecnoloxías de Galicia (CNTG) vai dar
acubillo a unha das paradas galegas da iniciativa Emprendedores
2020, unha xira-programa que vén da man da Escola de
Organización Industrial e dun grupo de xornalistas, avogados,
economistas, empresarios e profesores (unidos no Grupo DiarioCrítico)
e que se dirixe a espertar, alá por onde vai, espíritos e vocacións
xeradoras de innovación, produtividade, sustentabilidade e riqueza.
A parada compostelá dará comezo ás 16.30, contándose coa
presenza do xornalista Fernando Jáuregui e, máis tarde, coa
presenza do presidente da Xunta, Alberto Núñez Feijóo.
O programa, como dixemos,
diríxese a consolidar os alicerces dunha economía diferente da que
coñecemos, máis activa, integradora e baseada no coñecemento. A
mensaxe, engádese, é aplicábel a un amplo número de cidadáns:
emprendedores potenciais “que non se resignan a depender do
orzamento estatal ou da nómina do desemprego, ou a emigrar a outros
países”, sinalan os responsábeis da iniciativa.
Emprendedores 2020 é
unha iniciativa sen arela de lucro encamiñada a facer abrollar o que
os promotores do programa cualifican de xeración 2020, “unha
xeración de emprendedores, loitadores, xente preparada que non se
conforma co que lle foi dado”. As persoas que traballan para
alentar este proxecto son estas:
Fernando Jáuregui
Alicia Hernández
Ignacio Esteban
Mónica Urgoiti
Manuel Ángel Menéndez
Pablo Soler
Pablo M. Beleña
Javier Fernández Arribas
José Manuel Pazos
José Manuel Fouz
Lourdes Carmona
Emilio Martínez