EmojiWorks prepara teclados para escribir emoticonas rapidamente

mércores, 4 de novembro do 2015 Marcus Fernández

A mensaxería instantánea está a disparar o uso de emoticonas no noso día a día, e algo que até o momento parecía limitado a engadir un aceno ao final dunha mensaxe está a converterse nunha linguaxe na que comunicar certos matices que até o momento permanecían ausentes das mensaxes escritas, e para permitir o uso áxil de emoticonas dende EmojiWorks propoñen que, en vez de empregar teclados virtuais para elixir os símbolos que queiramos engadir ás nosas mensaxes, podamos empregar teclados físicos, dos que queren comercializar tres modelos distintos que poden encargarse por 79,95, 89,95 e 99,95 dólares e que contan con 47, 94 e máis de 120 emoticonas respectivamente. Os modelos máis caros non só incluirían máis emoticonas, senón que tamén facilitarían atallos aos tons de pel que poden elixirse nas emoticonas que representan a persoas.
Con este accesorio dende tabletas, smartphones e ordenadores persoais (aseguran a compatibilidade con iOS 9, OS X e Windows 10) poderiamos teclear emoticonas 10 veces máis rápido que mediante métodos habituais, xa que tardariamos menos en atopar a emoticona que queiramos empregar, especialmente unha vez que collamos certa práctica co teclado. Os teclados comunícanse por Bluetooth, funciona con dúas baterías AAA e precisan de software (incluído) de EmojiWorks para funcionar. A súa entrega está prevista para o mes que vén.

O modelo de teclado máis avanzado inclúe atallos a máis de 120 emoticonas

Vídeo promocional dos teclados de EmojiWorks

PUBLICIDADE