Educación achega á UDC 7,2 millóns de euros para avanzar en dixitalización e impulsar proxectos de I+D
venres, 18 de xuño do 2021
- O reitor, Julio Abalde, e o conselleiro, Román Rodríguez, xunto co vicerreitor de Economía e Planificación Estratéxica, Domingo Calvo, e o secretario Xeral de Universidades, Alberto Díez de Castro.
A
Xunta
de Galicia achegará á Universidade da Coruña un total de 7,2
millóns de euros para avanzar en dixitalización académica e para
proxectos de investigación. Así o fixo saber o conselleiro de
Cultura e Educación Román Rodríguez, que se reuniu na mañá deste
18 de xuño co reitor Julio Abalde para asinar (na Reitoría da UDC)
un novo convenio de colaboración entre as entidades.
Mediante
este acordo, a Xunta aportará á UDC 2,8 millóns de euros para
accións de innovación académica, dixitalización ou renovación
tecnolóxica e de infraestruturas.
As
accións englobadas no ámbito da innovación ou renovación
tecnolóxica inclúen iniciativas concretas para a renovación
tecnolóxica (licenzas, ciberseguridade,..), a formación en
competencias dixitais e o impulso da Administración Electrónica.
No
ámbito da dixitalización a Universidade poderá implantar melloras
na súa contorna tecnolóxica para a docencia e a transformación da
xestión académica. “Trátase de mellorar a potencia dos sistemas
de vídeo-conferencia, as prestacións do traballo colaborativo e
asegurar a conectividade de todos os usuarios, ao que se engade o
mantemento dos equipos informáticos, equipos e software”, explicou
o reitor.
En
canto ás infraestruturas, búscase aplicar unha serie de melloras
como potenciar a ventilación, acondicionamento ou reformas de
espazos, accesibilidade e seguridade. Así mesmo, a UDC poderá
implantar tamén iniciativas que busquen a mellora da eficiencia
enerxética a través de reformas parciais ou integrais de edificios
como centros de ensino ou de investigación.
No
acto, tanto o conselleiro como o reitor aproveitaron para facer un
balance deste curso. Rodríguez manifestou o seu agradecemento “á
universidade agora que remata o curso máis atípico e complexo da
historia recente”. E engadiu: “As universidades deron un exemplo
de adaptación a unha situación complicada”.
Pola
súa banda, o reitor recoñeceu o apoio da Consellería de Cultura,
Educación e Universidades. “Nunha situación de pandemia
agradecemos á Consellería que nos acompañase para superar esta
situación, na que as universidades fomos quen de manter as nosas
actividades”.
Ao
convenio asinado este 18 de xuño, seguiralle a semana próxima un
segundo por un importe de 4,4 millóns de euros para proxectos de
investigación.