Edisa amosará en Conxemar as últimas novidades de xestión da súa plataforma Libra
venres, 13 de setembro do 2013
A empresa galega Edisa
vén de informar que vai estar presente no salón Conxemar,
feira internacional con sede en Vigo e dirixida a expoñer e amosar
en detalle as máis recentes innovacións do sector dos produtos do
mar conxelados, e tamén “para o sector”. Precisamente este será
o cometido das empresas externas a este tecido como Edisa: mostrar as
últimas novidades de interese para a optimización da xestión das
compañías de conxelados. Neste senso, a firma TIC dará conta das
funcións e potencialidades da súa plataforma Libra, entre as que
salientan os últimos avances en mobilidade, a posibilidade de
integración con redes sociais, os máis recentes avances para a
xestión de multiproducción, os sistemas de toma de datos en planta
e o funcionamento na nube.
“Todo iso”, informa
Edisa, “permite ás empresas do sector o funcionamento en contorna
cloud computing ou o acceso ao sistema desde múltiples plataformas
tanto ordenadores persoais, como tabletas e teléfonos móbiles”.
Asemade, a firma exporá na feira (a celebrar do 1 ao 3 de outubro)
os principais elementos diferenciais de Libra, incluíndo aspectos
como a xestión do seguimento dos produtos, calidade, mobilidade,
loxística, etc. En palabras de Carlos Suárez, director xerente de
Edisa, “coa nosa participación un ano máis en Conxemar
aproveitamos a oportunidade para estar preto dos nosos clientes e
tamén para presentar as novidades e a previsión de novas
funcionalidades para os vindeiros anos. Así mesmo, o nivel de
penetración que se acadou no sector está a permitirnos achegar cada
vez máis ferramentas ás empresas, que axuden a mellorar aspectos
tan importantes como os custos, a calidade ou o soporte á toma de
decisións a todos os niveis”.
Para Edisa, é importante
destacar que Conxemar é unha feira que recibe unha gran cantidade de
visitas internacionais e que a empresa TIC nestes intres xa ten un
25% da súa facturación procedente do exterior, co que a feira tamén
representa para a compañía unha gran oportunidade.