Economía quere impulsar o papel de Galicia como subministradora de maquinaria 4.0

A Consellería de Economía quere poñer o foco no desenvolvemento galego de bens de equipo para a nova industria: a industria intelixente, tecnolóxica, optimizada, sustentábel e máis automatizada. Desta arela xurdiu o programa Maquinaria 4.0, que foi debullado hoxe os seus detalles por Francisco Conde, titular de Economía, durante un almorzo de traballo sobre a iniciativa celebrado en Compostela. Segundo fixo saber, o obxectivo é fomentar o xurdimento de “provedores fortes” que poidan servir mellor ao tecido empresarial galego, “buscando unha maior competitividade da industria e o incremento do valor engadido dos produtos exportados desde Galicia”.
Para conseguir os devanditos obxectivos, o programa inclúe axudas (para facer avanzar o proceso dende a oferta e dende a demanda), o establecemento de procesos de compra privada de tecnoloxía e o apoio ao desenvolvemento, estandarización e comercialización de maquinaria e bens de equipo, con axudas para empresas ou grupos de empresas que presenten un proxecto en común.
A iniciativa forma parte da nova Axenda Industria 4.0, a cuxo desenvolvemento a Xunta destinará 350 millóns de euros ata 2022 coa finalidade de “anticiparse aos cambios do novo modelo, aumentar o tamaño das empresas, favorecer a aposta polo talento dixital e contribuír á reinvención do tecido industrial galego e á súa especialización desde o punto de vista tecnolóxico”.