Economía achegará 12 millóns para axudar a 15.000 pemes e microempresas a investir en innovación
mércores, 27 de outubro do 2021
O
conselleiro
de Economía, Francisco Conde, presentou este martes 26, en Lugo, un
novo programa de impulso á innovación ao que a Xunta destina 12
millóns de euros co obxectivo de “axudar a 15.000 pemes e
microempresas galegas a investir neste eido”. Segundo fixo saber,
farase fincapé nas pequenas e medianas empresas con potencial para
innovar pero que aínda non o fixeron, así como nas situadas en
núcleos non urbanos. Porase o foco en todo tipo de sectores e en
pemes de todos os tamaños, na liña de dinamización do tecido
empresarial de base que comparten os proxectos que Galicia está a
presentar aos fondos europeos Next Generation.
Conde
explicou que entre as iniciativas que se promoverán ao abeiro deste
programa destaca Camiño da Innovación, un servizo de
atención ás pemes e unha exposición itinerante que percorrerá
Galicia ao longo de 18 etapas que chegarán ás catro provincias,
arrincando o 5 de novembro en Vilalba e incluíndo paradas (no caso
da provincia de Lugo) en Cervo (8 de novembro), Monforte de Lemos (30
de novembro), Chantada (1 de decembro) e Meira (9 de decembro), onde
finalizará.
Na
súa intervención, tras participar nunha mesa de debate con
responsables das empresas Legalmit, Maderas Besteiro e Comenza, Conde
incidiu na importancia da innovación como “elemento tractor ante a
saída da crise”, pola súa achega tanto á mellora da
competitividade como da sustentabilidade do tecido empresarial.
Segundo destacou, “a innovación é a esencia da competitividade
futura porque determina a capacidade dunha empresa para
diferenciarse, achegar valor, adaptarse ao contorno e crecer”.
Tamén
subliñou a necesidade de seguir apostando pola colaboración
público-privada para manter activo o dinamismo e a transformación
do tecido produtivo. Neste sentido, a Xunta asinou un convenio coa
Confederación de Empresarios de Lugo (CEL) co que se busca expandir
os puntos de información e asesoramento cos que conta a entidade.