Econocom e Osiatis celebran o día 22 en Santiago unha xornada sobre a Sociedade da Información na nosa terra
mércores, 15 de xaneiro do 2014
O Hotel AC Pazo do Carme
de Santiago de Compostela acollerá o vindeiro día 22 un seminario
sobre o estado de cousas da Rede na nosa terra. A xuntanza, que se
desenvolve baixo o epígrafe Sociedade da Información en Galicia,
vén da man de Econocom e
Osiatis, alianza empresarial con
sede de seu en Vigo e especializada en xestión de infraestruturas
tecnolóxicas e de comunicación. No seminario participarán entre
outros representantes do tecido público e empresarial das TIC, a
directora da Axencia para Modernización Tecnolóxica de Galicia, Mar
Pereira, e máis o director de operacións de Econocom-Osiatis, Mario
Villa. A directora de AMTEGA será a encargada de abrir a xeira de
relatorios.
O seminario contará
tamén con tres mesas redondas centradas nos eidos da Administración
autonómica, as entidades locais e as nosas universidades.
Como dixemos, o grupo
Econocom-Osiatis dispón de oficina de seu en Vigo, desde onde presta
servizo tanto a organizacións públicas galegas (Universidades de
Santiago de Compostela e Vigo, Deputación de Pontevedra, concellos
de Pontevedra e Lugo ou CRTVG) como a compañías privadas, “cos
exemplos das tendas de Caramelo, Gadisa ou Finsa como os máis
emblemáticos”, sinalan fontes da alianza empresarial. O seu
obxectivo na nosa terra, segundo fan saber, pasa por unha aposta
clara e firme polo desenvolvemento da Sociedade da Información. Con
esta finalidade, a compañía desprega arestora un amplo abano de
servizos para mellorar “a competitividade e eficacia das
organizacións galegas”, apunta Mario Villa, que nos confirma que o
programa de actividades da cita do día 22 contará coa presenza de
representantes dos Concellos da Coruña, Santiago de Compostela e
Vigo, da Axencia para a Modernización Tecnolóxica de Galicia
(AMTEGA), do Centro de Supercomputación de Galicia (CESGA), da
Consellería de Educación, da Universidade de Santiago de Compostela
e do Servizo Galego de Saúde (SERGAS).
O evento terá unha
duración de media xornada e para inscribírmonos é necesario que
acheguemos os datos persoais na
ligazón habilitada a tal efecto.
