Ecolec organiza unha feira de videxogos solidaria en Alacante
venres, 16 de xullo do 2010
A Fundación
Ecolec, unha entidade sen ánimo de lucro dedicada a xestionar a recollida,
tratamento, valorización e eliminación de residuos de aparellos eléctricos e
electrónicos (un labor tan útil como necesario dados os tempos que corren), vén
de anunciar que patrocinará a Feria de
Videojuegos Ciudad de Alicante que terá lugar o vindeiro fin de semana (do
venres 23 ao domingo 25 de xullo) de maneira ininterrompida na cidade valenciana.
Nesta feira, que
forma parte do Proxecto Xogando con
Tecnoloxía, desenvolverase o Open de
España de Videoxogos deportivos e a ela poderá asistir de balde calquera
persoa interesada neste tema.
Ecolec pretende,
con esta feira, transmitirlle ao público novo e ás súas familias a necesidade
de reciclar os aparatos eléctricos e electrónicos cando deveñen en residuo, así
como a maneira de facelo a través dos puntos
limpos ou nos mesmos comercios ao adquirir un aparato das mesmas funcións.
Cando xa non che sirvan recicla levándoos a un punto limpo vai ser a mensaxe que durante esta iniciativa lanzará a Fundación
Ecolec, polo que todas as persoas asistentes, segundo a organización, “saberán da necesidade de reciclar todo tipo
de aparellos eléctricos e electrónicos”.
Para isto, na
mesma feira haberá dispoñibles unha serie de puntos de reciclaxe onde as
persoas interesadas poderán deixar os seus dispositivos para ser reutilizados
nun futuro e faranse entrega, dende o stand
de Ecolec, de folletos informativos sobre este tipo de residuos.
O fin último e
máis importante deste proxecto solidario será, ademais de concienciar á
cidadanía co coidado do medio ambiente, donar videoconsolas e xogos educativos
ós hospitais para que os máis cativos, segundo aseguran, “teñan outras posibilidades de ocio durante a súa convalecencia”.