Ducias de arqueólogos amosan en Compostela as súas experiencias coas máis avanzadas tecnoloxías
martes, 8 de setembro do 2015
Compostela acollerá
desde mañá a xuntanza
anual da Aerial Archaeology Reserach Group (AARG), un
acontecemento no que van participar máis de 75 investigadores de
Europa e América amosando ao detalle os resultados dunha manchea de
proxectos de investigación levados a cabo coa axuda das máis
avanzadas tecnoloxías para a prospección arqueolóxico. Tecnoloxías
como imaxes de satélites, drons ou escaneado de láser. Segundo
informa a organización do encontro, é a primeira vez que os socios
da AARG xúntanse na contorna estatal. A asociación, unha entidade
fundada en 1983 no Reino Unido coa arela de promover o uso dos
devanditos recursos avanzados na arqueoloxía, reúnese en Santiago
da man do Consello Superior de Investigacións Científicas (CSIC), a
través do Instituto de Ciencias do Patrimonio (INCIPIT), e co apoio
da Axencia Galega de Innovación da Xunta de Galicia.
O evento arrancará ás
10.00 horas no centro cultural Abanca nun acto inaugural que contará
coas intervencións de Felipe Criado Boado, director do Instituto de
Ciencias do Patrimonio (INCIPIT-CSIC), e Pilar Morgade Saavedra,
directora da área de Programas da Axencia Galega de Innovación. Ao
longo de tres días, máis de 75 investigadores de Europa e América
presentarán os seus proxectos a través de comunicacións orais e
pósteres a tempo que debaten sobre os novos avances tecnolóxicos e
as súas perspectivas futuras. Entre os relatores estarán
arqueólogos de universidades como as de Santiago de Compostela,
Oxford ou Viena; de entidades como o Ludwing Bonzmann Institute for
Archaeological Prospection e Virtual Archaeology e de organismos
relacionados coa xestión do patrimonio como o English Heritage, a
Royal Commission for the Ancient and Historical Monuments of Scotland
ou o Instituto de Patrimonio de Noruega.
Entre eles, informa
INCIPIT-CSIC figuran algúns dos expertos que “máis contribuíron
ao desenvolvemento da arqueoloxía aérea en Europa”, como por
exemplo Chris Musson, ou responsábeis de grandes proxectos europeos
como Axel Posluschny, coordinador da iniciativa Archaeolandscapes
Europe (na que participan preto de 30 universidades europeas), ou
algúns dos investigadores máis punteiros no emprego das últimas
tecnoloxías dixitais para a prospección arqueolóxica, como Michael
Doneus ou Geert Verhoeven da Aerial Archaeology Research Group.
“Este encontro”,
informa César Parcero-Oubiña, investigador do do CSIC no INCIPIT,
“é unha excelente oportunidade para coñecer de primeira man o que
se está a facer en diferentes partes do mundo con estas tecnoloxías
e os abraiantes avances que están a supor para a arqueoloxía”.
Como dixemos, as sesións
do encontro terán lugar no centro cultural Abanca (Praza de
Cervantes) en horario de mañá e tarde. O programa desenvolverase ao
redor de relatorios convidados a cargo de arqueólogos que
desenvolven o seu labor en institucións académicas e empresas
privadas e sesións temáticas acerca de tres grandes bloques: as
novas tecnoloxías para a prospección arqueolóxica empregadas en
proxectos de investigación realizados en lugares como España,
Hungría, Alemaña, Estados Unidos ou o Himalaia; os avances técnicos
en prospección arqueolóxica, e, por último, a utilidade destas
tecnoloxías en lugares con importantes patrimonios arqueolóxicos en
perigo por conflitos bélicos ou desastres naturais (Oriente Próximo,
Norte de África, Nepal...).