Dispoñíbel en galego a versión 3.4.2 de LibreOffice, recomendada para empresas

Para quen queira seguir tendo no fogar ou na empresa unha suite ofimática libre, unha alternativa á de Microsoft e que estea en galego e sexa eficaz e rendíbel, se cadra hoxe a mellor solución é apostar por LibreOffice. E máis tendo en conta que OpenOffice, o xermolo de LibreOffice, non puído evolucionar como debería nos últimos tempos por mor do escaso compromiso de Oracle, propietaria do paquete, á hora de darlle unha axeitada continuidade. Leas aparte, LibreOffice vai cara adiante coma unha frecha, achegando completas solucións para usuarios particulares e tamén para empresas.
Se hai uns días falabamos en Código Cero da dispoñibilidade en galego da versión 3.4.1 da suite, agora é hora de facelo da achega 3.4.2, unha nova entrega, dispoñíbel tamén na nosa lingua, moi recomendada para as empresas e para as administracións públicas.
O anuncio que emitiu The Document Foundation (xestora e coordinadora do dito programa) acerca da publicación de LibreOffice 3.4.2 informa de que trátase da terceira versión da familia 3.4, unha achega na que colaboraron máis de 300 persoas e que serviu entre outras cousas para corrixir a maior parte das incorreccións ou eivas e, tamén, para subministrar un alto grao de estabilidade que se presenta, como dixemos, de especial relevancia para espazos empresariais ou administrativos.
Segundo se engade no blog da comunidade galega de LibreOffice, á que pertencen Antón Méixome e Miguel Bouzada (principais responsábeis de que poidamos empregar esta suite na nosa lingua) a devandita fundación internacional de informática libre xa está a animar ás grandes corporacións a integrar esta nova entrega no seu seo, incluíndo, iso si, recomendacións ben claras: que o fagan a través de provedores comerciais de asistencia técnica que teñan capacidade para estudar as demandas existentes e contribuír a un bo proceso de migración.