Dispárase grazas ao medre dos smartphones o rexistro fotográfico dos principais acontecementos mundiais
xoves, 11 de abril do 2013
Se a fotografía está hoxe en día ao alcance de
máis xente (moita máis xente) é por obra e graza dos novos móbiles
de última xeración, ou sexa, eses smartphones en
calquera das súas feituras que superan en calidade de imaxe aos
restantes aparellos e, tamén, en índice de vendas no mercado (así
se está a constatar este 2013, por vez primeira, tal e como se pode
ver en diversas investigacións, como por exemplo o máis recente
informe de iStockphoto).
Polo tanto, que é o que temos? Pois unha cantidade de seareiros da
fotografía dixital que non para de medrar cada ano, en boa medida
porque a cámara (de calidade media para arriba) vai con eles a todas
partes e todo apunta a unha mellora constante no adestramento de
desenfundar e
inmortalizar un intre. En termos concretos, falamos de 1.000 millóns
de usuarios de smartphones,
o que equivale a 1.000 millóns de fotógrafos espallados por todo o
mundo.
Asemade, para
completar a nosa visión sobre este fluxo constante de momentos
concretos cara a Internet, o número total de imaxes na rede social
Facebook é, a día de hoxe, 10.000 veces maior cá cantidade de
arquivos fotográficos atesourados na Biblioteca do Congreso dos
Estados Unidos. A maiores, en acontecementos de seguimento mundial
como o paso do furacán Sandy, contabilizáronse en servizos como
Instagram até 1,3 millóns de fotografías rexistrándoo e
documentándoo, engadíndose unha frecuencia de 10 fotografías por
segundo. A xuízo do devandito servizo iStockphoto, estamos
certamente ante o “boom da fotografía social, onde cada
día compártense millóns de instantáneas e vídeos capturados con
teléfonos intelixentes, sen que sexa preciso revelalas ou
imprimilas, e cunha calidade perfecta”.
Esta revolución ou democratización da documentación visual é,
engádese, “unha nova forma de rexistrar a historia cotiá
con fotos de alta calidade, as cales, ademais, pódense actualizar de
xeito inmediato en calquera rede social”.
De feito, estímase que os usuarios de Facebook soben cada día uns
250 millóns de fotos.