Detidos dous hackers españois por atacar, entre outras, a web da NASA
xoves, 19 de xullo do 2012
A Policía Nacional vén
de deter a dous españois de 20 e 23 anos expertos en informática que
atacaron, entre outras, a web da NASA, a do Consello de Seguridade Nacional ou
a de Telefónica.
Os hackers forman parte do grupo
LatinHackTeam, unha rede de delincuentes que actúan a nivel internacional dende
o ano 2008, e que teñen entre os seus obxectivos o ataque a institucións e organismos
importantes de ata 58 países diferentes.
O grupo hacktivista, ao que se
lle atribúen máis de 14.000 accións delitivas, ocupa na actualidade o cuarto
posto no ranking mundial de ciberataques, segundo afirman no portal especializado na materia, Zone-h.
As detencións producíronse ano e medio despois de que os investigadores comezaran
a seguirlle a pista a estes ciberdelincuentes, localizados en Madrid e Xaén,
que participaron activamente en ataques á web do Instituto de Estudos e Técnicas Educativas e de Formación do
Profesorado, á de Telecinco, á do BBVA ou
á da Caixa Manresa, amais das citadas
anteriormente.
No eido internacional tamén foron vítimas de
LatingHackTeam organismos como os Ministerios de Defensa do Reino Unido e
Francia, o departamento de Xustiza de Novo México en Estados Unidos ou
universidades americanas como a de Berkeley.
Os seus ataques consistían, basicamente, en
analizar e explotar as vulnerabilidades dos sistemas de seguridade, para logo cambiar
o aspecto orixinal da web, deixando, no seu lugar, a firma do grupo e un texto
reivindicativo para que o leran os usuarios.
Con estas intrusións ilícitas, ademais de
comprometer a imaxe e o contido das entidades afectadas, os hackers poderían ter accedido a datos “sensibles” aloxados nos seus sistemas,
como direccións de correo electrónico ou bases de datos con información
privada.