Deteñen ó primeiro creador de virus para móbiles en España

Despois de ter prexudicado a máis de 115.000 persoas en España, o primeiro creador de virus para teléfonos móbiles do estado pasará os vindeiros meses entre reixas tras ser detido pola Policía Nacional en Valencia.
O mozo de 28 anos, tiña creadas ata 20 clases de virus diferentes que, difundidos a través da rede de telefonía móbil, actuaban sempre do mesmo xeito: infectando os terminais e propagándose a tódolos teléfonos móbiles que se atopaban ó seu alcance a través do “bluetooth”, así como a tódolos números rexistrados nas axendas e nas listas de chamadas a través de mensaxes multimedia.
As perdas ocasionadas por estes virus, tanto ós consumidores como ás principais compañías operadoras, xa acadan cifras millonarias e iso que a verdadeira cantidade de afectados aínda se descoñece xa que resulta difícil de controlar a propagación do “becho” a través do “bluetooth”, que pode saltar de un móbil a outro que se atope a menos de 10 metros de distancia.
Os virus difundidos polo detido, baseábanse nos coñecidos “CommWarrior” e “Cabir”; este último interceptado por primeira vez en xuño de 2005, é o que emprega as sinais sen fíos de curto alcance para difundirse e segundo sinalan as autoridades, “dende que foi inventado, xa se expandiu por máis de 20 países”.
O devandito virus “Cabir”, creado por este individuo, reduce drasticamente a potencia dos teléfonos infectados, e as variantes máis potentes poden chegar a desactivar o terminal facendo que o usuario teña que acudir ás tendas especializadas ou talleres para reinicialo.