Desvelan os Xogos con Gold e de PS Plus de agosto

Tras meses nos que Microsoft deixaba bastante de lado os xogos mensuais para os subscritores de pagamento de Xbox LIVE o mes de agosto será por fin interesante á hora de comparar os xogos que ofrecen para consolas Xbox e PlayStation, xa que ambas plataformas apostan forte.
No caso de Xbox LIVE Gold temos que agosto comeza con Darksiders III, xogo de Xbox One que continúa a saga deseñada polo ilustrador de banda deseñada Joe Madureira, poñéndonos desta volta na pel de Furia, unha maga que se enfrontará aos Pecados Capitais na liña do que fixeron Guerra e Morte nas anteriores entregas. A este xogo seguirao na segunda matede do mes Yooka-Laylee, xogo de plataformas de mundo aberto que namorará especialmente aos máis pequenos da casa.
Como xogos retrocompatibles teremos Lost Planet 3 de Xbox 360, última entrega desta franquía que conta con modos multixogador; e tamén Garou: Mark of the Wolves, un clásico de loita 2D de SNK que supuxo a culminación da saga Fatal Fury en máquinas recreativas.
Pero a oferta de xogos para os subscritores de PlayStation Plus non queda atrás, tendo como prato forte Hunter’s Arena: Legends, título compatible con PS4 e PS5 que preséntase como un battle royale para 30 xogadores nun contorno de espada e bruxería no que os humanos loitan entre si e contra unha lexión demoníaca que asola o mundo.
Completan a este título o atípico xogo de acción Plants vs. Zombies: La Batalla de Neighborville e Tennis World Tour 2, ambos para PlayStation 4 e con propostas de acción directa que resultan ideais para divertirse en pleno verán. Cómpre salientar que o xogo de Plants vs. Zombies inclúe modo cooperativa a pantalla partida, mentres que o xogo de tenis tamén facilita retar a amigos en local, polo que ambos son grandes propostas para o período estival.