Derrúbanse as vendas de Wii U nos EE.UU.

NPD Group vén de publicar os datos de vendas de videoxogos do mes de xaneiro nos EE.UU. destacando especialmente as malas vendas da Wii U de Nintendo, que estarían por debaixo das 100.000 unidades, estimando dende Gamasutra que tal cantidade estaría entre as 45.000 e 59.000 unidades, moi lonxe das 460.000 do mes de decembro, polo que a situación da consolas doméstica de Nintendo parece crítica, dando a impresión de que non remontará as súas vendas ata que Nintendo publique os anunciados xogos de Super Mario, Zelda e Mario Kart para esta plataforma.
Pero as malas vendas da Wii U vense aínda peor se temos en conta que esta consola de nova xeración está a vender moi por debaixo da Xbox 360, que pese a que se espera que este ano estree sucesora, conseguiu colocar 281.000 unidades en xaneiro, presumindo dende Microsoft que a súa máquina conseguiu así liderar o mercado das consolas de videoxogos domésticas por 25º mes consecutivos, situación moi diferente á de mercados como o español, onde Sony aínda mantén unha boa posición.