Culturgal acubillará esta fin de semana a presentación do Portal das Palabras
mércores, 27 de novembro do 2013
Esta fin de semana que se vén enriba celébrase en
Pontevedra o gran acontecemento cultural galego, que en certa maneira
é o mesmo que dicir que se celebra a supervivencia da nosa cultura
botando man de canta canle empreguen os seus destinatarios, incluída
as cousas da Rede. En fin, que se celebra a nova edición de
Culturgal e como é de
agardar, amosaranse diferentes manifestacións do ensarillado das
nosas letras coas novas tecnoloxías e canles de comunicación. Un
ensarillado, por outra banda, do máis interesante. Entre estes
froitos do fenómeno TIC a presentar no Pazo da Cultura de Pontevedra
(dos que iremos dando conta estes días) inclúese o Portal das
Palabras, do que se vai falar moito na tarde do sábado, no salón de
actos do dito recinto pontevedrés e contando cos principais
responsábeis da iniciativa web: a Real Academia Galega e a Fundación
Barrié.
O Portal das
Palabras, do que xa temos falado en Código Cero con motivo do
seu lanzamento, é en boa medida unha casa-web na que petar e
rebuscar na procura de xeitos diferentes e complementarios de acceder
ás nosas letras. Máis polo miúdo, inclúense vídeos con
explicacións sobre os significados das nosas palabras, artigos
feitos polos membros da RAG nos que detallan os termos que máis lles
gustan e unha versión avanzada do dicionario en liña da RAG (con
procuras máis exhaustivas e específicas, sinónimos e versións
deste recurso para teléfonos móbiles con sistemas iOS ou Android).
Segundo explicou no seu día a RAG, a iniciativa vai dirixida a
“moitos tipos de persoas, dende rapaces en idades escolar a
persoas maiores que teñan interese polo noso idioma e o seu léxico;
tamén cremos que pode ser útil para axente que desexe achegarse ao
galego aínda que sexa de xeito inicial”.
Respecto á nova edición de Culturgal, lembrar que
se celebra os dias 29 e 30 de novembro e 1 de decembro no Pazo de
Cultura de Pontevedra. O salón, que volve ter o apoio directo de
EGANET (o seu presidente, Víctor
López, está implicado na directiva do evento), aumentou para esta
edición a contratación de stands. Haberá
cinco espazos definidos, sen renunciar á idea da casa común da
cultura: Espazo libro, Espazo
carpa, Espazo infantil, Espazo libro, Espazo tecnoloxía e Espazo
cinema.