Coruña acollerá unha fin de semana de lecer e desenvolvemento TIC para a nosa mocidade: o evento Smart Weekend
xoves, 22 de maio do 2014
O Concello da Coruña
está a preparar unha fin de semana de lecer e desenvolvemento
tecnolóxico compartido e cooperativo. A cita será no Coliseum,
inserida no programa de actividades do proxecto Coruña Smart City.
Segundo informa o Goberno local, “amais de diversión, o evento
achega unha gran oportunidade para que a mocidade amosa a súa
creatividade e capacidade de desenvolvemento tecnolóxico”. A
Smart Weekend, así se chama a xuntanza, desenvólvese a fin de
semana do 6 ao 8 de xuño. Terá capacidade para 500 postos de
rede Lan con conexión a Internet de alta velocidade por cortesía da
operadora galega R. Durante a xuntanza realizaranse diferentes
actividades como smart-Lan, smart-Dev e
smart-Ideas.
A smart-Lan
desenvolverase co formato habitual de Lan-Party. Durante a
smart-Lan os usuarios poderán intercambiar información a
través dun servidor de DC, participar en actividades, torneos de
videoxogos, enquisas e concursos, amais de gañar premios mentres
gozan do fin de semana.
Pola súa banda, a
smart-Dev é unha competición de desenvolvemento que pretende
achegar ao traballador por conta propia da informática “un gran
escaparate profesional”, informa a organización. Esta actividade
comezará o venres 6 de xuño pola tarde. As empresas que queiran
participar exporán unha serie de retos para que os freelance
desenvolvan solucións axeitadas ás necesidades definidas
durante toda a fin de semana. As solucións presentaranse o domingo 8
pola tarde e os gañadores de cada reto recibirán un premio por
cortesía de cada empresa. Ademais, se a solución consegue salientar
de xeito especial, achegarase ao seu creador ou creadora a
posibilidade de que a empresa lle ofreza unha entrevista de traballo
persoal. Segundo engaden os impulsores da iniciativa, “esta
actividade ofrece un networking profesional moi interesante,
tanto para as empresas como para os desenvolvedores”.
Polo que atinxe a
smart-Ideas, é unha iniciativa de Coruña Smart City que
consiste nun concurso de ideas e proxectos para facer da urbe galega
unha cidade máis eficiente e intelixente. Estas ideas e proxectos
serán presentadas o sábado 7 de xuño pola mañá perante un xurado
especializado “en formato de elevator pitch”, que consiste
en expor a idea dunha maneira clara e concisa e nun máximo de 5
minutos. As ideas poden ser de calquera tipo “sempre que estas
sexan viábeis, estean dirixidas ao ámbito urbano, teñan un enfoque
sustentábel e estean apoiadas nas novas tecnoloxías da
información”, explican os organizadores. “Este concurso”,
engaden, “é unha excelente oportunidade para presentar ideas
orixinais e creativas para a cidade, ante un xurado involucrado no
proxecto de Coruña Smart City que pode verse interesado no
desenvolvemento das propostas máis atractivas”.