Coruña Smart City dá comezo ás probas de conexións entre os sensores da cidade e a plataforma urbana
venres, 11 de abril do 2014
Do proxecto Coruña
Smart City temos falado en diversas ocasións, da
participación de Gradiant achegando a súa experiencia na Internet
das cousas, ou do
recoñecemento fornecido polo CPEIG hai aproximadamente dous anos.
Agora, toca falar de novo da iniciativa porque semella que deixamos
atrás a fase previa aos acontecementos visíbeis. Ou sexa, que todo
apunta a que os responsábeis de Coruña Smart City están a levar o
proxecto cara ao plano das realidades. De feito, estes mesmos días
iniciáronse as probas de conexión entre os sensores da cidade e a
plataforma urbana. Lembremos que a iniciativa vén da man do Goberno
local e un consorcio integrado por R, Indra, Altia e Iiux.
Como avanzamos, este
mesmo xoves os impulsores do programa amosaron as pasarelas
(gateways) que facilitarán a comunicación dos sensores e
captadores de información do cerebro da cidade. A isto, engadiron,
haberá que sumar a instalación os vindeiros días dos primeiros
dispositivos a modo de test en varios parques e edificios públicos
da cidade. Estas manobras, explican, constitúen “o primeiro gran
fito tanxíbel do proxecto de cidade intelixente”.
Acerca dos devanditos
dispositivos, deseñados e desenvolvidos polo operador galego R,
destacan polo “seu alto contido innovador e pola súa capacidade
para integrar tecnoloxías de distintos fabricantes”. Ademais,
engade o consorcio, permitirán conectar os sensores e outros
elementos de captación de información na cidade coa plataforma
urbana de Coruña Smart City, que é o gran cerebro da cidade.
En total, para o proxecto
Coruña Smart City fabricaranse 415 pasarelas que se conectarán coa
plataforma a través da rede de alta velocidade por fibra óptica de
R. A nivel práctico, estes dispositivos captarán a información da
rúa. Para facernos unha idea disto, os responsábeis do programa
informan que as prazas libres de aparcadoiro (cando o piloto de
aparcamento intelixente estea en marcha) serán quen de achegar esta
información de dispoñibilidade ao cerebro da cidade e logo estes
datos enviarase á aplicación específica do aparcamento
intelixente.
Os impulsores de Coruña
Smart City tamén informan que as pasarelas concibíronse dende a súa
orixe como “dispositivos de moi baixo consumo, o que permite a súa
alimentación a través de baterías ou paneis solares”. Ademais,
engaden, “son modulares e están preparados para conectarse a todo
tipo de redes e protocolos e adaptarse a contornas diferentes en
función da súa localización, tanto en interiores como en
exteriores, e que poden ser parques, fachadas ou semáforos, entre
outros”.
Lembrar tamén que a
plataforma urbana conta con infraestrutura precisa para comezar a
recibir datos de todo tipo (tráfico, acontecementos sociais ou
culturais, etc) e para que as empresas que vaian desenvolver os 14
pilotos previstos poidan conectarse desde o inicio para integrar as
súas solucións. Na actualidade licitáronse 10 dos 14 proxectos
piloto que actuarán nos diferentes ámbitos da cidade. Entre eles,
atópanse en proceso de adxudicación: o Sistema de Rega Intelixente,
Sistema de Información sobre Eventos, Eficiencia Enerxética en
Edificios Públicos, Visitas Guiadas, Sistema de Calidade e Control
de Aire e Ruído e Administración Electrónica.
Para os responsábeis do
proxecto galego, o gran obxectivo deste gran cerebro é servir de
alicerce para a xestión e integración de todos os servizos e
solucións intelixentes que conforman o ecosistema dunha urbe coma a
coruñesa en ámbitos como o medio ambiente, a enerxía, a mobilidade
urbana, a sanidade, a seguridade, o lecer e o turismo e a
eAdministración. Trátase pois dun “centro xestión intelixente”
que permite que os sistemas intercambien coñecemento para fornecer
“unha visión completa da actividade”.